Ўзбекистонда сўнгги кунларда содир бўлган ЙТҲлар оқибатида 5 киши вафот этди. ЙТҲ тафсилотлари

Сўнгги кунларда хабар қилинган Ўзбекистонда содир бўлган 5 та йўл-транспорт ҳодисаси оқибатида 5 киши вафот этди, 4 киши жароҳатланди. Қуйида ушбу ЙТҲ тафсилотларини тақдим этамиз.

Навоийда Nexia 13 ёшли велосипедчининг ҳаётига зомин бўлди.

Навоий вилояти Хатирчи туманидан ўтган 4Р-48 автомобиль йўлининг 133-километрида Янгиробот–Зарафшон йўналишида ҳаракатланиб келаётган Nexia автомашинаси йўлни кесиб ўтаётган велосипедчини уриб юборган.

Оқибатда 13 ёшли велосипедчи ҳалок бўлган.

Ҳолат юзасидан 29 ёшли ҳайдовчига нисбатан Хатирчи тумани ИИБ ТБ томонидан Жиноят кодексининг тегишли бандлари билан жиноят иши қўзғатилган.

Наманганда Matiz темир тўсиққа урилиши оқибатида ҳайдовчи аёл вафот этди.

2021 йил 10 ноябрь куни соат 19:00 ларда, Пунгон–Наманган йўлининг 68 километрида, «Поросмон» МФЙ ҳудудида, Наманган шаҳар Давлатобод туманида яшаган, 1986 йилда туғилган аёл Matiz автомашинасини бошқариб бораётиб, ҳаракат хавфсизлигини таъминлай олмай, бошқарувни йўқотиб, йўлнинг ўртасини ажратиб турувчи темир тўсиққа урилган.

Оқибатда ҳайдовчи тан жароҳати олиб, воқеа жойида вафот этган ва автомашинада бўлган йўловчи, Янгиқўрғон туманида яшовчи, 1999 йилда туғилган фуқаро бош мия асосининг синиши, чап чакка суягининг очиқ синиши ташхиси билан тан жароҳати олиб, шифохонага ётқизилган.

Ушбу ҳолат бўйича Тўрақўрғон туман ИИБ ҳузуридаги ТБ томонидан 2021 йил 10 ноябрь куни Жиноят кодексининг 266-моддаси 2-қисми (одам ўлимига сабаб бўлган транспорт бошқариш хавфсизлиги қоидаларини бузиш) билан жиноят иши қўзғатилган.

Термизда Labo бетон устунга урилди.

2021 йил 13 ноябрдан 14 ноябрга ўтар кечаси 02:30 ларда Термиз шаҳри Баркамол авлод ва Кўзмунчоқ кўчаси кесишган чорраҳада Labo русумли автомашина бошқарувни йўқотиб, йўл ўртасидаги бетон устунга урилган.

Оқибатда ҳайдовчи олган тан жароҳатлари сабабли шифохонада вафот этган.

Labo ва Nexia тўқнашувида 1 киши вафот этди 3 киши жароҳатланди

2021 йил 12 ноябрь куни соат 10:00 ларда, Жомашуй–Тегирмон–Навбаҳор йўлининг 38 километрида, Поп тумани «Навбаҳор» МФЙ ҳудудида, Мингбулоқ туманида яшовчи, 1992 йилда туғилган фуқаро Nexia автомашинасини бошқариб бораётиб, ҳаракат хавфсизлигини таъминлай олмай, қарама-қарши йўналишда ҳаракатланиб келаётган, Фарғона вилояти Учкўприк туманида яшовчи, 1962 йилда туғилган фуқаро бошқарувидаги Labo автомашинаси билан тўқнашган.

Оқибатда Labo автомашинаси ҳайдовчиси олган оғир тан жароҳати оқибатида шифохонада вафот этган ҳамда Nexia автомашинасида бўлган 3 нафар йўловчилар турли жароҳат билан шифохонага ётқизилган.

Ушбу ҳолат бўйича туман ИИБ ҳузуридаги ТБ томонидан Жиноят кодексининг 266-моддаси 2-қисми билан жиноят иши қўзғатилган.

Тўрақўрғонда Damas велосипедчининг ўлимига сабабчи бўлди.

2021 йил 12 ноябрь куни соат 16:45 ларда, Косонсой–Тўрақўрғон–Мингбулоқ йўлининг 54-километрида, Тўрақўрғон тумани «Ободон» МФЙ ҳудудида, шу туманда яшовчи, 1986 йилда туғилган фуқаро Damas автомашинасини бошқариб бораётиб, ҳаракат хавфсизлигини таъминлай олмай, йўлни кесиб ўтаётган велосипедчи Тўрақўрғон туманида яшаган, 1955 йилда туғилган фуқарони уриб юборган.

Оқибатда велосипедчи олган тан жароҳати оқибатида воқеа жойида вафот этган.

Ушбу ҳолат бўйича туман ИИБ ҳузуридаги ТБ томонидан Жиноят кодексининг 266-моддаси 2-қисми билан жиноят иши қўзғатилган.