Қаршидаги банк шохобчасида ёнғин юз берди (видео)

Қаршида «Халқ банки» филиалига қарашли кичик шохобчада 14 ноябрь куни ёнғин юз берди. Бу ҳақда Қашқадарё вилояти ФВБ хабар берди.

Қайд этилишича, Ислом Каримов кўчасида жойлашган ушбу банк шохобчасида ёнғин содир бўлаётгани тўғрисида хабар Қарши шаҳар Фавқулодда вазиятлар бўлимига соат тахминан 11:02 лар атрофида келиб тушган.

Хабарга кўра, 2-ёнғин-қутқарув қисмидан 2 та бўлинма воқеа жойига етиб борган ва ёнғинни соат тахминан 11:15 лар атрофида тўлиқ ўчирган. Ёнғин оқибатида банк шохобчасининг 8 метр квадрат майдонда том қисми ва ташқи қопламаси зарар кўрган. Бинонинг 82 метр квадрат майдони ҳамда ичидаги жиҳозлари ёнғиндан сақлаб қолинган.

Аниқланишича, ёнғин электр кабелларининг қисқа туташув натижасида содир бўлган ва ҳодиса оқибатида ҳеч ким тан жароҳати олмаган.

Қарши шаҳридаги мебель цехида содир бўлган ёнғин оқибатида уч нафар фуқаро вафот этгани ҳақида хабар берилган эди.