Сирдарё вилоятининг Мирзаобод туманидаги далалардан бирида бўйин қисми ўткир тиғ билан кесилган жасад топилгани ҳақида хабарлар тарқалди.
Бош прокуратура ахборот хизмати раҳбари Ҳаёт Шамсутдинов «Дарё» сўровига асосан бу хабарни тасдиқади. 11 ноябрь куни соат 16:30 да Мирзаобод тумани ИИБ хабарига асосан, Мирзаобод тумани, «Бек кластер»га тегишли дала майдони ҳудудида 53 ёшли Ғ.А.нинг мурдаси бўйин соҳаси кесилган ҳолатдаги тан жароҳати билан топилган.
Воқеа жойини кўздан кечириш давомида дастаси жигарранг ошхона пичоғи, «Рапира» номли лезвия ва бошқа зарур буюмлар ашёвий далил тариқасида олинган.
Ғ.А.нинг вафот этгани юзасидан тайинланган судга оид комиссион экспертизасининг дастлабки хулосасида унинг ўлимига бўйин соҳаси қон томирлари трахея ва қизилўнгачни кесилиши ва ташқи қон кетиши сабаб бўлгани кўрсатилган.
Тарқалган хабарларда жасаднинг катта эҳтимол билан ҳарбий экани айтилганди. Бош прокуратура ахборот хизмати раҳбарининг «Дарё»га аниқлик киритишича, марҳум Фавқулодда вазиятлар вазирлиги Мирзаобод тумани бўлимида ишчи бўлиб ишлаган.
Мазкур ҳолат юзасидан Мирзаобод туман прокуратураси томонидан терговга қадар текширув ҳаракатлари олиб борилмоқда.
Эслатиб ўтамиз, май ойининг охирларида Сирдарёдаги даладан бутунлай ёниб кетган эркак жасади топилиб, ҳолат юзасидан жиноят иши қўзғатилганди. Олиб борилган тезкор суриштирув ҳаракатлари давомида марҳум деб тахмин қилинган шахс аслида тирик бўлиб, Оҳангарон шаҳрида яшириниб юргани аниқланганди.
Изоҳ (0)