Toshkent shahar, Olmazor tumani, Universitet ko‘chasida joylashgan oshxonada 28-oktabr kuni yong‘in yuz berdi, deb xabar bermoqda FVV matbuot xizmati.
Qayd etilishicha, yong‘in sodir bo‘layotgani to‘g‘risidagi xabar Toshkent shahar Favqulodda vaziyatlar boshqarmasiga soat 13:44 da kelib tushgan. Voqea joyiga 4 ta yong‘in-qutqaruv ekipaji soat 13:50 da yetib borib, yong‘in soat 14:03 da qurshab olingan va soat 14:09 da batamom o‘chirilgan.
Hodisa oqibatida jabrlangan va halok bo‘lganlar yo‘q. Yong‘in oqibatida oshxona binosining 120 metr kvadrat maydoni yonib zararlangan.
Ijtimoiy tarmoqlarda holat aks etgan videolar ham tarqaldi. Unda yong‘in Toshkent davlat texnika universiteti yonidagi oshxonada yuz berganini ko‘rish mumkin.
FVV matbuot xizmati xabarida aytilishicha, hozirda yong‘inning kelib chiqish sababi va moddiy zarar miqdori aniqlanmoqda.
