Samarqand viloyat hokimi Erkinjon Turdimov 11-oktabr kuni tibbiyot sohasi mas’ullari bilan uchrashuv chog‘ida viloyat aholisiga sohadagi kamchiliklardan ogohlantirish bo‘yicha murojaat qildi. Bu haqda O‘zA xabar berdi.
“Tibbiyot sohasini yaxshilash, mavjud kamchiliklar, ta’magirliklar, e’tiborsizlik oqibatida yuzaga kelayotgan salbiy holatlar bo‘yicha ma’lumotlaringizni 97 405 40 09 Telegram raqamiga yo‘llashingizni so‘rayman”, — degan Erkinjon Turdimov.
Qayd etilishicha, ushbu ma’lumotlar asosida sohadagi rejalarga o‘zgartirishlar kiritilib, tasdiqlangan faktlar bo‘yicha xulosa qilinadi.
“Bugun tibbiyot sohasini xalqimiz, keng jamoatchilik nazoratisiz, ular bilan bevosita muloqotsiz o‘zgartirib bo‘lmaydi. Sohada ta’magirliklar, tanish-bilishchiliklar, ko‘plab noto‘g‘ri ishlar bo‘layotgani hech kimga sir emas. Faqat birgalashib, bunday holatlarning oldini olishimiz mumkin”, — deya qo‘shimcha qilgan viloyat hokimi.
Eslatib o‘tamiz, Erkinjon Turdimov noyabr oyi avvalida viloyatdagi 3 nafar hokim va 20 nafar hokim o‘rinbosariga qat’iy ogohlantirish hamda hayfsan intizomiy jazo choralarini qo‘llagandi. Ular Davlat xizmatini rivojlantirish agentligi barcha viloyat, tuman va shaharlardagi hokim va hokim o‘rinbosarlari faoliyatini eng muhim samaradorlik ko‘rsatkichlari (EMSK, KPI) asosida baholash tizimida past natija qayd etgan.
Shuningdek, 30-aprel kuni viloyat hokimi Erkin Turdimov ishtirokida hududdagi maktabgacha ta’lim tashkilotlari faoliyatiga bag‘ishlangan yig‘ilish bo‘lib o‘tgan. Unda viloyat Maktabgacha ta’lim boshqarmasi boshlig‘i faoliyatiga qoniqarsiz baho berilgan.
Izoh (0)