Тошкент шаҳрида Касаба уюшмалари федерацияси томонидан «Янги Ўзбекистон — янги касаба уюшмалари» байрами ва Касаба уюшмалари куни муносабати билан 11 ноябрь куни айрим йўналишларда транспорт ҳаракати чекланади. Бу ҳақда Тошкент шаҳар Ички ишлар бош бошқармаси хабар қилди.
Қайд этилишича, шу куни соат 08:00 дан 18:00 гача бўлган муддатда шаҳарнинг Бухоро кўчаси Бухоро—Буюк Турон чорраҳасидан, Бухоро—Зарафшон чорраҳасигача бўлган ҳудуд ёпилади. Тошкент шаҳар ИИББ тирбандликларнинг олдини олиш учун ҳайдовчиларга айланма йўллардан фойдаланишни тавсия қилган.
Аввалроқ йўл таъмирлаш ишлари олиб борилиши сабабли Тошкент шаҳри Аҳмад Дониш кўчасининг Амир Темур шоҳкўчаси билан кесишмасидан Нурафшон кўчасигача бўлган оралиғидаги икки томонлама йўлнинг бир томони 7 ноябрдан 17 ноябргача қисман ёпилиши хабар қилинганди.
Шунингдек, Тошкент шаҳрининг Чилонзор туманидаги Маҳмуджон Ғафуров кўчасида транспорт воситаларининг ҳаракатланиши 5 кун, 10 ноябргача чекланиши, кейинроқ шу йўлнинг очилиш муддати яна 5 кунга узайтирилгани ва у 15 ноябрь куни очилиши маълум қилинган.
Изоҳ (0)