Ўзбекистон Марказий банки аҳолининг турли гуруҳлари истеъмол кайфиятини ўрганиш бўйича навбатдаги сўровлари шарҳини эълон қилди.
Ушбу ўрганишга респондентларнинг даромадлари ва харажатлари таркиби, мавжуд пул-маблағларини жамғаришга бўлган мойиллиги, шунингдек, уларнинг келгусида кредитга бўлган эҳтиёжларини аниқлаш ва таҳлил қилиш бўйича саволлар киритилган.
Сўров давомида иштирокчиларнинг қарийб 70 фоизи даромадларининг асосий манбаи ойлик иш ҳаққи, 15 фоизга яқини эса тадбиркорлик фаолиятидан олинадиган даромадларга тўғри келишини таъкидлаган. Хориждан пул ўтказмаларни қайд этган респондентлар улуши эса 3,4 фоизга тенг.
Шунингдек, ҳудудлар кесимида ҳам расмий ойлик иш ҳаққи асосий даромад манбаи эканлигини кўриш мумкин. Хусусан, Тошкент шаҳри (68,8 фоиз), Бухоро (61 фоиз), Андижон (58,7 фоиз) ва Тошкент вилоятлари (58,1 фоиз) респондентлари жавобларида ойлик маошнинг асосий даромад сифатида юқори улуши қайд этилган.
Тадбиркорлик фаолияти шуғулланишни қайд этган респондентларнинг катта қисми Навоий, Қорақалпоғистон Республикаси, Жиззах, Наманган ва Хоразм вилоятлари ҳиссасига тўғри келган.
Сўров натижаларига кўра, жами респондентларнинг катта қисми, яъни 60 фоизи келгуси ойларда янги кредит олишга эҳтиёжлари мавжудлиги таъкидлаган.
2021 йилнинг II чорагида респондентларнинг даромади 1−3 миллион сўм ташкил этувчи қисми кредитга бўлган талаби юқорилиги қайд этишган бўлса, III чоракда 3−5 миллион сўм ва 5−7 миллион сўм даромадли респондентларда ҳам кредитларга бўлган эҳтиёжи сезиларли ортгани кузатилган.
Ўрганишларга кўра, 52 фоизга яқин респондентлар келгуси давр учун жамғармалари кўпайишини таъкидлаган. Ушбу кўрсаткич ўтган II чорак натижалари билан солиштирилганда, ижобий жавобларҳиссаси 6 фоиз бандга яхшиланган.
Қайд этилишича тижорат банклари томонидан таклиф этилаётган жозибадор депозит турлари ва улардаги юқори даромадлилик, аҳолининг бўш пул маблағларини жамғариш ҳамда омонатга йўналтиришни қўллаб-қувватловчи асосий омиллардан бўлиб хизмат қилмоқда.
Аввалроқ Марказий банк келгуси 3 йилда Ўзбекистон иқтисодиётини ривожлантиришнинг икки сценарийсини эълон қилгани, Ўзбекистонда жисмоний шахсларнинг муаммоли кредитлари ҳажми йил бошидан буён 5,4 бараварга ошгани тўғрисида эълон қилинганди.
Изоҳ (0)