Чилида депутатлар мамлакат президентига импичмент эълон қилишни маъқуллади

Чили парламентининг депутатлар палатаси президент Себастьян Пиньерага импичмент эълон қилиш учун овоз берди. Энди сўнгги сўз Сенатда қолган, деб ёзади «ТАСС».

«Депутатлар палатаси 78 та розилик, 67 та қаршилик ва 3 та бетарафлик овози билан президент Себастьян Пиньеранинг импичментини маъқуллади», — дейилади парламент вакилларининг баёнотида.

Қарор президентлик сайловларига икки ҳафтадан камроқ вақт қолганда қабул қилинган. Бу сафарги сайловларда 71 ёшли Пиньера иштирок этмайди, унинг президентлик муддати 2022 йил 11 мартда тугайди.

Импичмент жараёни мухолифат томонидан «Пандора архивлари» ҳужжатларига асосланиб, президентга қўйилган коррупция айбловлари сабаб бошланган.

3 октябрь куни Вашингтондаги Халқаро тадқиқот журналистикаси консорциуми (IСIJ) бутун дунё раҳбарлари, сиёсатчилари ва миллиардерларининг махфий бойликлари ҳамда молиявий ҳужжатларини фош этувчи «Пандора архивлари» ҳисоботини тақдим этди. У 11,9 миллион махфий ҳужжатларга асосланган. Ҳужжатларни таҳлил қилишда BBC, The Washington Post, Le Monde ва бошқа 150 оммавий ахборот воситасининг 600 дан ортиқ журналисти иштирок этган.