Соғлиқни сақлаш вазирлиги 4 ноябрдан буён Ўзбекистонда кузатилаётган чанг бўронининг инсон саломатлигига салбий таъсири ва ундан қандай ҳимояланиш зарурлиги бўйича маълумот берди.
Республика илмий ихтисослаштирилган аллергология маркази директори, тиббиёт фанлари доктори, профессор Илмира Розиқованинг сўзларига кўра, бундай вазиятда имкон қадар очиқ ҳавода юрмаслик зарур. Айниқса, бронхиал астма, аллергик ринит, аллергик конюктивит, томоқ қичишиши билан кузатиладиган йўтал, бронхит, бронхлар гиперреактивлиги ва бошқа нафас йўли сурункали касалликлари бор инсонлар ташқарига чиқмаслиги керак.
Унинг таъкидлашича, бундай ҳаво таркибида чанглар билан бирга, ўсимлик чангчалари, замбуруғ споралари жуда катта концентрацияда бўлади. Шу боис хасталиклари бор кишилар шифокор маслаҳати билан аллергияга қарши дори воситалари дозаларини оширишлари лозим. Розиқова ним таъсир қилувчи тузли сув билан томоқ ва бурунларни чайиш, хоналарни ёпиқ сақлаш, хўл сочиқларни хоналарга осиш, каттароқ сиғимли идишларга сув солиб қўйишни маслаҳат берган.
Агар фуқароларда ташқи муҳитдаги чанглар туфайли нафас қисиши, бурун битиши, аксириш, бурун оқиши, кўзларда қичишиш ва қизариш, томоқда кучли қичишиш, қичишиш билан кузатиладиган йўтал белгилари юзага келса, тезда аллерголог шифокорга мурожаат қилишлари лозимлиги айтилмоқда.
«3 ноябрь куни тез ёрдам хизматига бўлган жами чақириқлар сони 3433 тани ташкил этганди. Кеча эса бу кўрсаткич 4082 тага етди. Шундан 678 таси бевосита нафас сиқиши билан боғлиқ мурожаатлардир. Ушбу беморларга бригадамиз томонидан биринчи тез тиббий ёрдам кўрсатилиб, маълум қисми госпитализация қилинди», — дейди Республика шошилинч тиббий ёрдам илмий маркази Тошкент шаҳар тез тиббий ёрдам станцияси бош шифокори Дониёр Бўрибоев.
Эслатиб ўтамиз 4 ноябрь куни тупроқнинг қуруқ устки қатламларини шамол кўтаргани туфайли Тошкент шаҳри ва бошқа вилоятларда чанг–қум аралаш туман юзага келди. Пойтахт ҳавосидаги чанг миқдори меъёрдан 5 баробар ошиб кетди. Шу билан бирга, ҳаво ҳарорати нолдан пастга тушди.
Изоҳ (0)