Ўзбекистонда аёлларни қўллаб-қувватлашга қаратилган «Тадбиркор аёл» ассоциацияси 1991 йилда ташкил топган бўлиб, бугунги кунгача ҳудудларда унинг 68 та бўлимлари ташкил этилган. Ўтган давр мобайнида ассоциация томонидан маҳаллий ва халқаро институтлар билан ҳамкорликда хотин-қизлар учун 100 га яқин лойиҳалар амалга оширилди. Натижада 50 минг нафардан ортиқ хотин-қизлар тадбиркорлик малакасига эга бўлиб, уларнинг 80 фоизи иш билан банд бўлди. 45 минг нафар аёл бизнес юритиш асослари ва методикасига ўргатилиб, ўз бизнесини ташкил эта олди. Минглаб янги иш ўринлари яратилди.
Жорий йилда «Тадбиркор аёл» Ўзбекистон ишбилармон аёллар ассоциацияси 30 ёшга тўлди. Юбилей муносабати билан Ўзбекистонда халқаро аёллар тадбиркорлиги ҳафталиги ташкил қилинади. Ҳафталик «Аёлларнинг иқтисодий ҳуқуқ ва имкониятларини кенгайтиришга муваффақиятли ёндашувлар: Ўзбекистон ва жаҳон ҳамжамияти тажрибаси» мавзусида бўлиб ўтади.
Ҳафталикда аёлларнинг ҳуқуқий-иқтисодий имкониятларини кенгайтиришда ишбилармон доиралар ва бизнес ҳамжамиятининг ўрни, гендер тенглиги, кичик ва ўрта бизнеснинг иқтисодиётдаги ўрни ҳамда тадбиркор аёлларнинг илғор тажрибаларини оммалаштириш масалалари муҳокама этилади.
- Мамлакатимиз аёллари иқтисодий ҳуқуқ ва имкониятларини кенгайтириш;
- Тадбиркор аёллар, давлат идоралари ва бошқа жамоат ташкилотлари ўртасидаги ўзаро ҳамкорликнинг самарали механизмларини муҳокама қилиш;
- Инвестициялар жалб қилиш, яқин ва узоқ хориж ишбилармонлари билан манфаатли савдо алоқаларини ўрнатишда тадбиркор аёлларга кўмаклашиш;
- Мамлакатнинг савдо-иқтисодий, туристик имкониятларини тарғибот қилиш ўтказилажак ҳафталикнинг асосий мақсадлари ҳисобланади.
Ҳафталикда мамлакатимиз ишбилармон аёллари билан бир қаторда давлат ва нодавлат ташкилотлари, хорижий ташкилотларнинг мамлакатимиздаги ваколатхоналари раҳбарлари, қатор мамлакат элчилари, хорижий бизнес экспертлар, Ўзбекистон, Украина, Исроил давлатлари тадбиркорлик уюшмалари, илмий тадқиқот, халқаро, молия институтлари, суғурта муассасалари ва ОАВлари иштирок этишади.
Шунингдек, мамлакатимиз барча вилоятларида тадбиркор аёллар иштирокида учрашувлар, давлат ва жамоатчилик ташкилотлари билан давра суҳбатлари, маҳорат дарслари, савдо кўргазма ярмаркаларини ўтказиш режа қилинган.
Ҳафталик доирасида ўтказиладиган тадбирларда Ўзбекистонда аёллар тадбиркорлигини янада ривожлантириш, улар учун оптимал бизнес муҳитини яратиш бўйича тавсиялар ишлаб чиқилади. Ҳафталик тавсиялари тегишли давлат, вазирликлар, бошқармалар, маҳаллий ҳокимият органлари, тадбиркорлик уюшмаларига тақдим этилади.
Реклама ҳуқуқи асосида.
Изоҳ (0)