Сурхондарё вилоятининг Денов туманида содир бўлган йўл-транспорт ҳодисаси оқибатида бир киши ҳалок бўлди, деб хабар беради вилояти ИИБ ЙҲХБ ахборот хизмати.
Маълум қилинишича, 22 октябрь куни 10:30 ларда туманнинг «Чағониён» маҳалласи ҳудудидан ўтувчи М41 автомобиль йўлининг 1484-километрида Тожикистон фуқароси бошқарувида бўлган юк автомобили Сариосиё—Термиз йўналишида ҳаракатланиб кетаётганида, унинг тиркамаси Nexia’нинг йўлига чиқиб кетган ва ЙТҲ содир этган.
Содир бўлган авария оқибатида Nexia’нинг 23 ёшли ҳайдовчиси воқеа жойида вафот этган.
«Бу каби ЙТҲларнинг олдини олиш мақсадида маҳалла фаоллари, ҳайдовчилар ўртасида тарғибот-ташвиқот ишлари олиб борилди», — дейилади хабарда.
Аввалроқ Тошкентда автобусга бориб урилган Lacetti ҳайдовчиси воқеа жойида вафот этгани, Тошкентда Matiz йўл четида турган уч нафар пиёдани уриб юбориб, ағдарилгани, Қашқадарёда Nexia ва Captiva тўқнашуви оқибатида икки ҳайдовчи вафот этгани тўғрисида хабар берилганди.
Изоҳ (0)