Сурхондарё вилоятида вазифасига киришган ички ишлар органи ходимлари йўриқномада кўрсатилган ҳолатларда электрошок қурилмаларини қўллашни бошлайди. Бу ҳақда Ички ишлар вазирлиги матбуот хизмати хабар қилди.
Маълум бўлишича, «Скорпион» русумли электрошок қурилмаси амалиётда фойдаланиладиган резина таёқ, яъни «дубинка»га ўхшаш шаклда ишлаб чиқарилган. Ундан, заруратга қараб, «дубинка» сифатида ҳам фойдаланиш мумкин.
Қайд этилишича, электрошок таъсирида инсон танаси биринчи сонияда оғриқ зарбасини ҳис қилса, иккинчи сонияда мушаклар мувозанати йўқолади.
Электрошокерни кекса ёшдагилар, ногиронлиги аниқ кўриниб турган шахслар, ёш болалар ҳамда ҳомиладор аёлларга нисбатан қўллаш тақиқланади. Агар улар томонидан қуролли ёки гуруҳ бўлиб ҳужум қилинса, бу тақиқларга амал қилинмайди.
Эслатиб ўтамиз, аввалроқ Ўзбекистонда 24 сентябрдан бошлаб ички ишлар органлари ходимлари томонидан электрошокердан фойдаланиш бошлангани хабар қилинганди. Унда айтилишича, ИИО ходимларининг махсус воситалар ва ўқотар қуроллардан фойдаланиш тартиби «Ички ишлар органлари тўғрисида»ги қонунга асосланган бўлиб, ички ишлар вазирининг бу борадаги тегишли буйруғи қабул қилинган.
Маълумотга кўра, ички ишлар органи ходимининг қонуний талабларини бажармаслик, ҳокимият вакилига ёки фуқаровий бурчини бажараётган шахсга қаршилик кўрсатиш оқибатида ИИО ходимлари ёки фуқароларнинг ҳаёти ва соғлиғига реал хавф туғдирган тақдирда ушбу қурилма ходимлар томонидан фойдаланилади. Электрошок қурилмалари Россиянинг «Март» заводи томонидан ишлаб чиқарилган.
Бундан ташқари, Фарғонада ички ишлар органлари ходимлари 24 сентябрдан электрошокердан фойдаланишни бошлаши маълум қилинган. Унга кўра, ИИО ходимлари хизмат жараёнида электрошокер қурилмасидан фойдаланишдан аввал махсус тайёргарлик ва даврий текширувдан ўтказилади. Махсус тайёргарликдан ўтган ходимга тегишли сертификат берилади.
Изоҳ (0)