Британияда Гарри Поттер исмли 33 ёшли эркак Жоан Роулинг қаламига мансуб «Гарри Поттер ва ҳикматлар тоши» романининг биринчи нашрига оид китобни 27,5 минг фунтга сотди. Бу ҳақда Hansons аукцион уйига таяниб, Esquire хабар берди.
14 октябрь куни кимлигини ошкор этмаган британиялик харидор китобни 22 минг фунтга сотиб олган, яна 5,5 минг фунт аукцион уйи учун комиссия сифатида тўланган.
Китоб чоп этилган вақтда унинг бир нусхасини Поттерга отаси — Дэвид Жеймс Поттер совға қилган. «Отам Терри Воган BBC Radio 2 орқали Гарри Поттерни тилга олганини эшитиб қолган ва у бошловчи ўзининг саккиз ёшли ўғлини эмас, балки мукофотга лойиқ кўрилган болалар китобини назарда тутаётганини англагач, фургонини ортга бурган ва китоб дўконидан биз учун бир нусха харид қилган», — дейди Гаррининг опаси Кети.
Оила узоқ вақт давомида китобни сотишни истамаган, аммо кейинроқ қариндошлар савдодан тушган пулларни оила эҳтиёжлари учун ишлатишга қарор қилган. Китобни сотишдан тушган пулни Поттер ва унинг 36 ёшли опаси 2017 йилда вафот этган марҳум отасининг хокини Кенияга кўчириш учун сарфлайди.
Гарри Поттер савдо менежери бўлиб ишлайди. Сўнгги 25 йилдан бери одамларга бу ўзининг ҳақиқий исми эканини тушунтиришга мажбур бўлмоқда. «Улар шунчаки менга ишонмайди. Болалар футбол жамоасида ўйнаганимда ўзимни Гарри Поттер деб атаганим учун ҳакам менга қизил карточка билан таҳдид қилганди. Рафиқам Филиппани Грецияда дам олишда учратиб қолганман, у ҳам менга ишонмаган», — дейди Поттер.
Аввалроқ Дэниэл Редклифф «Гарри Поттер»нинг бирорта қисми қайта суратга олинса, қайси персонажни ўйнашни хоҳлашини маълум қилганди.
Изоҳ (0)