«Миллий тикланиш» партиясидан президентликка номзод Алишер Қодиров овоз берган участкада ЎзЛиДеП номзоди Шавкат Мирзиёев 88 фоиз овоз тўплади, деб хабар беради «Gazeta.uz».

Фото: «Дарё» / Мадина Нурман

«Миллий тикланиш» партиясидан президентликка номзод Алишер Қодиров Миробод туманида 83-мактабда ташкил этилган 116-сайлов участкасида рафиқаси билан овоз берган эди. Маълумот учун, М.Қодирова айнан шу мактабда ўқитувчилик қилади.

Фото: «Дарё» / Мадина Нурман

24 октябрь соат 20:45 ларда мазкур сайлов участкаси бошлиғи Марҳабо Пирязова 116-сонли сайлов участкасида овоз бериш натижаларини эълон қилган. Баённома маълумотларига кўра, бу ерда сайловчиларнинг 96,2 фоизи (рўйхатга олинган 2661 нафар сайловчидан 2561 нафари) иштирок этган, 111 киши муддатидан олдин овоз берган. 113 та бюллетен ишлатилмай қолди, 9 таси бузилгани учун яроқсиз деб топилган.

Фото: «Gazeta.uz»

Овозлар қуйидагича тақсимланган:

  • Шавкат Мирзиёев (ЎзЛиДеП) — 2254 (88,01 фоиз);
  • Алишер Қодиров (Миллий тикланиш) — 103 (4,02 фоиз);
  • Мақсуда Ворисова (ХДП) — 84 (3,28 фоиз);
  • Баҳром Абдухалимов («Адолат») — 63 (2,46 фоиз);
  • Нарзулло Обломуродов (Экологик партия) — 48 (1,87 фоиз).

Натижалар эълон қилингач, томонларнинг ишончли вакиллари баённома нусхаларини олган ва участкани тарк этган.

Эслатиб ўтамиз, Ўзбекистонда 24 октябрь куни президент сайлови бўлиб ўтди. Мамлакат бўйлаб очилган 10 мингдан ортиқ сайлов участкалари соат 08:00 дан 20:00 га қадар сайловчиларни қабул қилди. Марказий сайлов комиссияси маълумотига кўра, сайловда жами рўйхатга олинган сайловчиларнинг 80,8 фоизи овоз берди.