“Milliy tiklanish” partiyasidan prezidentlikka nomzod Alisher Qodirov ovoz bergan uchastkada O‘zLiDeP nomzodi Shavkat Mirziyoyev 88 foiz ovoz to‘pladi, deb xabar beradi “Gazeta.uz”.
“Milliy tiklanish” partiyasidan prezidentlikka nomzod Alisher Qodirov Mirobod tumanida 83-maktabda tashkil etilgan 116-saylov uchastkasida rafiqasi bilan ovoz bergan edi. Ma’lumot uchun, M.Qodirova aynan shu maktabda o‘qituvchilik qiladi.
24-oktabr soat 20:45 larda mazkur saylov uchastkasi boshlig‘i Marhabo Piryazova 116-sonli saylov uchastkasida ovoz berish natijalarini e’lon qilgan. Bayonnoma ma’lumotlariga ko‘ra, bu yerda saylovchilarning 96,2 foizi (ro‘yxatga olingan 2661 nafar saylovchidan 2561 nafari) ishtirok etgan, 111 kishi muddatidan oldin ovoz bergan. 113 ta byulleten ishlatilmay qoldi, 9 tasi buzilgani uchun yaroqsiz deb topilgan.
Ovozlar quyidagicha taqsimlangan:
- Shavkat Mirziyoyev (O‘zLiDeP) — 2254 (88,01 foiz);
- Alisher Qodirov (Milliy tiklanish) — 103 (4,02 foiz);
- Maqsuda Vorisova (XDP) — 84 (3,28 foiz);
- Bahrom Abduxalimov (“Adolat”) — 63 (2,46 foiz);
- Narzullo Oblomurodov (Ekologik partiya) — 48 (1,87 foiz).
Eslatib o‘tamiz, O‘zbekistonda 24-oktabr kuni prezident saylovi bo‘lib o‘tdi. Mamlakat bo‘ylab ochilgan 10 mingdan ortiq saylov uchastkalari soat 08:00 dan 20:00 ga qadar saylovchilarni qabul qildi. Markaziy saylov komissiyasi ma’lumotiga ko‘ra, saylovda jami ro‘yxatga olingan saylovchilarning 80,8 foizi ovoz berdi.
Izoh (0)