Ўзбекистонда коррупция манбаси бўлган ёки унга хизмат қиладиган лавозимлар рўйхати тузилади

Коррупцияга қарши курашиш агентлиги «Коррупция даражасини рейтинг баҳолаш методикаси асосида давлат органларида, шу жумладан, ҳудудларда коррупция даражасини рейтинг баҳолаш тизимини жорий этиш тўғрисида»ги Вазирлар Маҳкамаси қарори лойиҳасини муҳокамага қўйди.

Қарорга кўра, кенг аҳоли қатлами, тадбиркорлик субъектлари, шу жумладан, Ўзбекистонда фаолият юритаётган хорижий инвестициялар иштирокидаги корхоналар, маҳаллий ва халқаро экспертлар ўртасида сўровномалар ўтказилади. Сўровномалар натижаларини таҳлил қилиш асосида давлат органлари ва ҳудудларда коррупциянинг тарқалганлик даражаси аниқланади.

Баҳолаш натижалари асосида:

• коррупциянинг тарқалганлик даражаси рейтинги, шу жумладан, коррупция хавфи юқори бўлган давлат органлари ва ҳудудлар рўйхати шакллантирилади;
• баҳолаш натижалари ҳар йили 1 декабрга қадар Олий Мажлиси палаталари, Президент Администрацияси, Вазирлар Маҳкамаси, Коррупцияга қарши курашиш миллий кенгашига киритилади;
• баҳолаш натижалари оммавий ахборот воситаларида, давлат ва хўжалик бошқаруви органлари, маҳаллий ижро этувчи ҳокимият органларининг расмий веб-сайтларида эълон қилинади.

Бундан ташқари, агентлик қонунчиликни такомиллаштириш, ҳуқуқни қўллаш амалиётини бирхиллаштириш, ходимларнинг меҳнат шароитларини яхшилаш, назорат ва жавобгарликни кучайтиришга доир таклифлар ишлаб чиқади.

Молия вазирлигига Коррупцияга қарши курашиш агентлиги буюртманомаларига асосан сўровномаларни ўтказиш ва эълон қилиш учун зарур бўлган маблағларни давлат бюджети харажатлари параметрларида назарда тутган ҳолда ажратиш вазифаси юкланган.

Аввалроқ «Норматив-ҳуқуқий ҳужжатлар ва уларнинг лойиҳаларини коррупцияга қарши экспертизадан ўтказишни янада такомиллаштириш чора тадбирлари тўғрисида»ги Президент қарори қабул қилингани тўғрисида хабар берилганди. Қарорга кўра, норматив-ҳуқуқий ҳужжатларни коррупцияга қарши экспертизадан ўтказиш тартиби жорий этилган.