Россия бош вазири ўринбосари Татьяна Голикова 19 октябрь куни Россияда 30 октябрдан 7 ноябргача (4 ноябрь куни Халқ бирлиги куни нишонланади, 5 ноябрдан 7 ноябргача шундоқ ҳам дам олиш кунлари эди) ишга чиқилмайдиган ҳафталик эълон қилишни таклиф этди, деб ёзади Meduza. Коронавирус билан касалланиш даражаси энг тез ўсаётган баъзи ҳудудларда ишланмайдиган кунлар 23 октябрданоқ бошланиши мумкин.

Фото: EPA

Охирги бир неча кундан буён кўплаб ҳудудларда, масалан, Санкт-Петербургда кўргазма ва концертлар, спортзаллар, ресторанлар ва ҳатто савдо марказларига кириш учун QR-кодлар жорий қилиниши ҳақида эълон қилинди. Шунингдек, бутун Россия бўйлаб, Ставропол ўлкаси, Ингушетия ва Қалмоғистондан ташқари, аҳолининг баъзи гуруҳларини мажбурий эмлаш жорий этилган.

Мажбурий вакцинация Москвада ҳам бор. Шаҳарда Кўп функцияли марказларда ва савдо марказларида COVID-19 га экспресс-тест ташкил қилинган, мактаб ўқувчиларини текшириш бошланган ва метрода ниқоб тақиш устидан назорат кучайтирилган.

25 октябрдан шаҳарнинг 60 ёшдан ошган аҳолиси, шунингдек, сурункали касалликлари бўлган москваликлар уй режимига юборилди. Эмланганлар ёки сўнгги ярим йил ичида коронавирусга чалиниб ўтганлар бунга риоя қилмаслиги мумкин. Ташкилотлар ўз ходимларининг 60 фоизини, шу жумладан, 60 ёшдан ошган ва сурункали касалликлари бўлган барча ишчиларини масофадан ишлашга ўтказиш мажбуриятини олди. Чоралар 2022 йил 25 февралгача амал қилади.

Шунга қарамай, Meduza манбаларига кўра, пойтахт ҳокимияти ҳозирча QR-кодларни қайтармоқчи эмас. COVID-19 га қарши кураш бўйича федерал тезкор штабга яқин манба сўзларига қараганда, Москва мерияси умумий овқатланиш муассасалари учун QR-кодларни киритишни истамаяпти, чунки «рестораторлар нолийди».

«Бизни мажлисга чақириб йиғмади: чекловлар йўқ, чекловлар бўйича йиғилишлар ҳам йўқ. Москва чекловлардан манфаатдор эмас, у ҳалигача чекловлардан жабр кўрган бизнесга катта-катта пулларни тўлашда давом этмоқда. Ҳамма янги чекловлардан тийилишга умид қилмоқда», — деди «Мясо & Риба» ресторанлар тармоғи асосчиси, Москва ресторан бизнеси омбудсмани Сергей Миронов.

Шаҳар раҳбариятига яқин бўлган Meduza манбаси маълум қилишича, ҳукумат фикрича, ресторан ва кафеларда QR-кодлар киритилиши «вакцинация суръатларига таъсир қилмайди, касалланишлар занжирини эса бу чеклов уза олмайди». 15 октябрь ҳолатига, мерия маълум қилганидек, Москвада декабрь бошидан буён беш миллиондан ортиқ одам эмланган, 279 минг киши қайта эмланган (шаҳар аҳолиси 12,6 миллион кишини ташкил қилади).

Умуман олганда, Meduza манбасига кўра, шаҳарда коронавирус бўйича янги ҳолатларнинг ўсиши билан боғлиқ вазият жиддий хавотирларга сабаб бўлмаяпти. «Ҳаммаси зўр», — деди шаҳар раҳбариятига яқин бўлган Meduza манбаси. Хусусан, деди у, 19 октябрь куни Москвада кунлик касалланиш даражаси 5,7 минг кишига тенг бўлган (аввалги тўлқин авжига чиққан пайт шаҳарда кунига 8 мингдан зиёд одамда вирус аниқланарди).

Шу билан бирга, касалхонага ётқизиш ҳолатлари бўйича 19 октябрь куни Москва 1,5 минг кишилик маррадан ўтди; 639 киши сунъий нафас олдириш аппаратига уланган ҳолда бўлган.

Москвада COVID-19 билан касалланиш ҳолатларининг ўсишига ҳукумат, одатда, касалхоналарда қўшимча жойлар яратиш билан чора кўради. Meduza маълумотларига кўра, 15-шаҳар касалхонасининг асосий биносидан ташқари, туғруқ бўлимида ҳам яқинда коронавирус беморларини қабул қилиш қайта бошланган. Яна бир қатор касалхоналарда ҳамда «Крилатское» муз саройида ва «Москва» автомобиль савдо марказида ҳам коронавирусга чалинганлар қабул қилинмоқда.

19 октябрь ҳолатига кўра, COVID-беморлар учун мўлжалланган ўринларнинг 70 фоизи тўлиб бўлган. Октябрь бошида Москва мэри Сергей Собянин коронавирус беморлари учун 12,5 мингта жой борлиги, уларнинг 8 мингтаси бандлигини маълум қилганди.

Жорий ҳафта охиригача мерия қўшимча койкалар яратиш ҳақида қарор қабул қилиши мумкин, бу, хусусан, кунлик касалхонага ётқизиш ҳолатлари сўнгги бир неча кундаги каби юқори даражада сақланиш-сақланмаслигига боғлиқ бўлади.