Толиблар ўз сафини «ёмон одамлар»дан тозалашни бошлади

Афғонистонда разведка хизматлари, Ички ишлар вазирлиги ва Мудофаа вазирлигининг қўшма комиссияси «Толибон» сафини коррупционeрлардан тозалашга киришди.

Фото: AP Photo

Таъкидланишича, гап ўз лавозимларини қариндошлари ёрдамида эгаллаган одамлар, жиноятчилар, ўтмиши шубҳали бўлган кишилар ёки маҳаллий аҳолининг нафратини қўзғатувчи амалдорлар ҳақида бораётган бўлиши мумкин.

«Разведка бош бошқармаси, Мудофаа ва Ички ишлар вазирлиги томонидан ‘Толибон’ сафини ва гуруҳларини ёмон ва порахўр одамлардан тозалаш учун тузилган қўшма комиссия Ислом Амирлиги (толиблар ўз сиёсий тизимини шундай атайди) вазирлари буйруғи билан бутун мамлакат бўйлаб ўз ишини бошлади», — деб ёзди ҳаракат вакили Забиҳулла Мужоҳид Twitter’да.

АҚШда Афғонистон бўйича янги махсус вакилини тайинланди

АҚШнинг Афғонистон бўйича махсус вакили Залмай Халилзод истеъфога чиққанидан кейин ушбу лавозимни унинг собиқ ўринбосари Томас Уэст эгаллайди.

«Аввал махсус вакил ўринбосари бўлган Томас Уэст Афғонистон бўйича кейинги махсус вакилга айланади», — дейилади давлат котиби Энтони Блинкен баёнотида.

Блинкен қайд этишича, Уэст Жо Байден Барак Обама маъмурияти даврида вице-президент лавозимини эгаллаб турган вақтда у раҳбарлик қилган хавфсизлик гуруҳи таркибида бўлган.

Томас Уэст Жонс Ҳопкинс университетини «халқаро алоқалар» йўналиши бўйича битирган. Давлат департаменти ва Оқ уйда ишлаб, Жанубий Осиё ва Яқин Шарқ муаммоларига ихтисослашган.

2011—2012 йилларда Афғонистоннинг Кунар вилоятида қайта тиклаш ишлари билан шуғулланган ҳарбий бўлмаган ходимларга раҳбарлик қилган. 2012 йилдан 2015 йилгача Миллий хавфсизлик кенгашида Афғонистон ва Покистон ҳамда Яман йўналишларини бошқарган. Байденнинг махсус маслаҳатчиси бўлган.

Афғонистон бўйича аввалги махсус вакил Халилзод Дональд Трамп томонидан 2018 йилда тайинланган эди. Ундан олдин, собиқ президент кичик Жорж Буш даврида Халилзод БМТдаги доимий вакил, шунингдек, Ироқдаги (2005—2007 йиллар) ва Афғонистондаги (2003—2005 йиллар) элчи бўлган.

У 18 октябрь куни ўз истеъфоси ҳақида эълон қилди. Блинкенга йўллаган хатида у ҳозир унинг кетиши учун айни вақт эканини, чунки АҚШ Афғонистонга нисбатан сиёсат олиб боришнинг янги босқичига кираётганини айтган.

У ўз хатида ёзишича, афғон ҳукумати ва «Толибон» ўртасидаги келишувлар дастлаб кўзда тутилгани каби амалга оширилмаган. Халилзод воқеаларнинг бундай тус олиши сабаблари ҳақидаги фикрлари билан яқин келажакда бўлишишга ваъда берди.

Эслатиб ўтамиз, «Толибон» Афғонистонни август ўрталарида эгаллаб олди. Улар Байден мамлакатдан Америка қўшинлари олиб кетилишини эълон қилганидан кейин, апрелдан буён ҳужумларни олиб бораётган эди. Ўз қўшинларини чиқариб кетиш ҳақидаги келишувни АҚШ «Толибон» билан ўтган йил февралида имзолаган эди.

«Толибон» БМТга Афғонистонда болаларни полиомиелитга қарши эмлашга рухсат берди

Жаҳон соғлиқни сақлаш ташкилоти (ЖССТ) «Толибон» раҳбариятининг ЖССТ ва ЮНИСЕФнинг Афғонистондаги болаларни полиомиелитга қарши эмлаш бўйича кампаниясини қўллаб-қувватлаш қарорини олқишлади.

Полиомиелитга қарши вакцинация 8 ноябрда бошланади ва уч йил ичидаги биринчи шундай акцияга айланади.

Кенг кўламли кампания натижасида қарийб 3 миллион бола эмланиши кутилмоқда. ЖССТ эслатишича, полиомиелит фалажлик ва ўлимга олиб келиши мумкин бўлган хавфли касалликдир. Инфекциядан ишончли ҳимоя учун оғизга томизиладиган вакцинани бир нечта дозада олиш керак.

Таъкидланишича, полиомиелитга қарши иммунизацияни амалга ошириш имкониятига БМТ ва «Толибон» вакиллари ўртасидаги музокаралар натижасида эришилган. Томонлар қизамиқ ва коронавирусга қарши вакцинацияни ҳам қайта тиклашга келишган.