Қозоғистон президентининг халқаро ҳамкорлик бўйича махсус вакили Ержан Казихан раҳбарлигидаги делегация ишчи ташриф билан Афғонистонга бориб, «Толибон» ҳукумати раҳбарининг ўринбосари Абдулғани Бародар ва ташқи ишлар вазири вазифасини бажарувчи Амир Хон Муттақий билан учрашди, деб ёзади «Коммерсантъ» Қозоғистон президенти матбуот хизматига таяниб.
«Қозоғистон томонидан афғон халқига гуманитар ёрдам кўрсатиш ва савдо-иқтисодий алоқаларни қайта тиклаш масалалари муҳокама қилинди», — дейилади хабарда.
Ержан Казиханнинг сўзларига кўра, Афғонистонга 5 минг тонна ун кўринишида гуманитар ёрдам етказилган. Шунингдек, Қозоғистон Афғонистон томонида коронавирусга қарши QazVac вакцинасини тақдим этиш таклифини билдирди.
Бундан ташқари, учрашув чоғида томонлар савдо-иқтисодий алоқаларни қайта тиклаш ҳамда афғонистонлик талабалар учун Қозоғистонда таълим дастурларини давом эттиришдан ўзаро манфаатдорликни билдирди.
Казихан БМТ бош котибининг махсус вакили, ташкилотнинг Афғонистонга кўмаклашиш бўйича миссияси раҳбари Дебора Лайонс билан ҳам кўришди. Улар Афғонистонда гуманитар ва озиқ-овқат инқирозини енгиб ўтиш учун Қозоғистон ва БМТ ўртасидаги ҳамкорликни кенгайтиришни муҳокама қилди.
Изоҳ (0)