Ўзбекистон Ташқи ишлар вазирлиги Афғонистондаги масжидларнинг бирида содир этилган портлаш юзасидан расмий баёнот берди.
15 октябрь куни Афғонистоннинг Қандаҳор шаҳрида жойлашган шиалар масжидида портлаш содир этилди. Ҳодиса қурбонлари сони 62 кишига етган.
Вазирлик баёнотида таъкидланишича, Ўзбекистон Қандаҳор вилоятидаги масжидда содир этилган ҳамда кўплаб инсонларнинг ҳалок бўлишига олиб келган навбатдаги террорчилик ҳаракатини кескин қоралайди.
«Бундай ғайриинсоний ҳужумлар вазиятнинг янада кескинлашувига олиб келади ва Афғонистонда узоқ муддатли тинчлик ўрнатилишига тўсқинлик қилади. Афғонистон ҳукуматининг мамлакатда бу каби ҳодисаларнинг олдини олиш учун қўшимча чоралар кўриш ҳаракатларини олқишлаймиз», — дейилади баёнотда.
Ўзбекистон ҳукумати ушбу ғайриинсоний ҳужумда ҳалок бўлганлар ва жароҳатланганларнинг оилаларига чуқур ҳамдардлик ва таъзия изҳор этади, шунингдек, жароҳатланганларнинг тезроқ соғайиб кетишини тилайди.
Эслатиб ўтамиз, 8 октябрь куни Афғонистондаги масжидда юз берган портлаш оқибатида 100 га яқин одам ҳалок бўлганди. Ўшанда ҳам Ўзбекистон Қундуз шаҳрида жума намози пайтида кўплаб қурбонларни келтириб чиқарган террорчилик ҳаракатини кескин қоралаган эди.
Изоҳ (0)