O‘zbekiston Tashqi ishlar vazirligi Afg‘onistondagi masjidlardan birida sodir bo‘lgan portlash yuzasidan rasmiy bayonot berdi.

Foto: “Daryo” / Madina Nurman

8-oktabr kuni Afg‘onistondagi masjidda yuz bergan portlash oqibatida 100 ga yaqin odam halok bo‘lgani to‘g‘risida xabar berilgandi. Hozirgacha hech bir qurolli muxolifatchi guruh portlash uchun javobgarlikni o‘z zimmasiga olmagan. Biroq ilgari shialarga qarshi ko‘plab hujumlar uchun javobgarlikni IShID bo‘yniga olgandi.

Tashqi ishlar vazirligi bayonotida ta’kidlanishicha, O‘zbekiston Qunduz shahrida juma namozi paytida ko‘plab qurbonlarni keltirib chiqargan terrorchilik harakatini keskin qoralaydi.

“Bunday zo‘ravon harakatlar Afg‘onistonda barqaror va uzoq muddatli tinchlik hamda milliy kelishuvni o‘rnatishga to‘sqinlik qiladi”, — deyiladi xabarda.

O‘zbekiston hukumati ushbu g‘ayriinsoniy hujumda halok bo‘lganlar va jarohatlanganlarning oilalariga chuqur hamdardlik va ta’ziya izhor etadi.

Eslatib o‘tamiz, bu Afg‘onistonda so‘nggi bir hafta ichida sodir bo‘lgan birinchi portlash emas. “Afghanistan.ru” xabariga ko‘ra, o‘tgan yakshanba kuni Kobuldagi masjid yaqinida portlash sodir bo‘lgan va buning uchun javobgarlikni IShID o‘z zimmasiga olgan. Bundan tashqari, 6-oktabr kuni kechasi Xost viloyatidagi diniy maktab tashqarisida yana bir hujum uyushtirilgan, 1-oktabr kuni esa Parvon viloyatining shimolida teraktlar sodir etilgani xabar qilingan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.