Давлат активларини бошқариш агентлиги Tashkent City’даги замонавий дам олиш ва истироҳат боғини келгусида хусусийлаштириш ва сақлаш (эксплуатация) юзасидан «Мастер план» ишлаб чиқиш учун профессионал ташкилотлар жалб қилиш тўғрисида эълон берди.
Таъкидланишича, Tashkent City халқаро ишбилармонлик маркази Маъмурий кенгашининг тегишли қарорига мувофиқ марказ ҳудудидаги замонавий дам олиш ва истироҳат боғини баҳоланган қийматда очиқ танлов савдолари орқали сотиш режалаштирилган.
Давлат тендер комиссиясининг тегишли қарорига асосан объектни хусусийлаштириш ва ундан келгусида фойдаланиш бўйича «Мастер план» ишлаб чиқиш учун профессионал ташкилотни жалб этиш белгиланган.
Шунга кўра, Давлат активларини бошқариш агентлиги Tashkent City халқаро ишбилармонлик маркази ҳудудидаги замонавий дам олиш ва истироҳат боғини келгусида хусусийлаштириш ва ундан келгусида фойдаланиш талаблари, шунингдек, хусусийлаштириш шартлари ва шакллари бўйича «Мастер план» ишлаб чиқиш учун профессионал ташкилот танлаб олиш юзасидан танлов эълон қилади.
«Мастер план»даги объектни хусусийлаштириш ва ундан келгусида фойдаланиш бўйича таклиф этиладиган тартиб ва талаблар Ўзбекистон қонунчилигига мувофиқлиги, шунингдек, объектнинг соҳа ҳамда индивидуал хусусиятларини ҳисобга олган ҳолда ишлаб чиқилиши лозим.
Профессионал ташкилот «Мастер план»ни ишлаб чиқади, у бўйича барча зарурий хизматларни кўрсатади. Буюртмачи ушбу эълон билан профессионал ташкилот ва «Мастер план»га қўйиладиган дастлабки талабларни, шунингдек, унинг таклифининг тузилишини ҳамда тегишли тартибда баҳоланишини белгилайди.
Объект ҳақида маълумот, таклифларнинг тузилиши ва унга қўйилган талаблар билан ушбу ҳавола орқали батафсил танишиш мумкин.
Эслатиб ўтамиз, 2021 йил 14 октябрдан бошлаб Tashkent City боғига кириш яна бепул бўлди. Tashkent City халқаро ишбилармонлик маркази дирекцияси раҳбари Баҳром Ризаев «Дарё»га берган интервьюсида боғни сақлаб туриш учун ойига 900 миллион сўм атрофида маблағ сарфланиши, унинг қурилишида ҳам, ҳозир ҳам бюджетдан ҳеч қандай пул аралашмаганини маълум қилганди.
Изоҳ (0)