Norvegiya janubidagi Kongsberg shahri markazida kamon va nayzalar bilan qurollangan erkak odamlarga hujum qildi. Bu haqda Norvegiyaning NRK teleradiokompaniyasi politsiyaga tayanib xabar berdi.
Foto: NRK
Hujumchi shahar markazi bo‘ylab yurgan hamda bir necha kishini o‘ldirishga va yaralashga ulgurgan.
Politsiya xabariga ko‘ra, hujum oqibatida besh kishi halok bo‘lgan, yana uch kishi, jumladan, bir politsiyachi jarohatlangan. Hujum haqida rasmiylarga birinchi xabar kelib tushganidan, taxminan, yarim soat o‘tgach, gumonlanuvchi qo‘lga olingan. Hibsga olish paytida u qarshilik ko‘rsatgani sababli politsiya ogohlantiruvchi o‘q uzishga majbur bo‘lgan.
Mahalliy Aftenposten gazetasi politsiya va o‘z manbalariga tayanib xabar berishicha, hujumchi 37 yoshli Daniya fuqarosi bo‘lib chiqdi.
“Ayblanuvchi 37 yoshli Daniya fuqarosi, u Kongsbergda yashaydi”, — deyiladi politsiya xabarida. Shu bilan birga, nashr manbalari bu odam ilgari islomni qabul qilganini aytgan.
Erkak nima sababdan odamlarga hujum qilgani noma’lum. Politsiya uni yolg‘iz harakatlangan deb hisoblamoqda. Shuningdek, idora terakt versiyasini tekshirmoqda.
Hujum uyushtirilgan joyga yaqin uyda yashovchi ayolning guvohlik berishicha, u ayol kishining qichqiriqlarini eshitgan. Hozir jinoyat sodir etilgan hudud qurshab olingan. U yerga ko‘plab politsiyachilar va bir nechta vertolyotlar kelgan.
Kongsbergdagi hujum tufayli butun Norvegiya politsiyachilariga qurollanish buyurildi (ular odatda qurol olib yurmaydi). Norvegiya bosh vaziri Erna Sulberg shoshilinch matbuot anjumani o‘tkazdi, u bo‘lib o‘tgan voqeani “dahshatli” deb atadi.
25-iyun kuni Germaniyada noma’lum shaxs o‘tkinchilarga pichoq bilan hujum qilgandi. Hodisa oqibatida uch kishi halok bo‘lgan, kamida olti kishi jarohatlangan.
Avvalroq Xitoyda noma’lum shaxs pichoq bilan bolalar bog‘chasiga hujum qilib, 16 nafar bola va 2 tarbiyachini yaralagan edi. Shuningdek, Gruziyada qurollangan shaxs bankka bostirib kirib, odamlarni garovga olgani haqida xabar berilgan.
2-aprel kuni esa AQSh Kongressi binosi yaqinidagi nazorat punktiga avtomobil kelib urilgandi. Haydovchi mashinadan sakrab tushib, pichoq bilan ikki politsiyachiga hujum qilgan, oqibatda politsiyachilardan biri halok bo‘lgan.
