«Муҳташам юз йил» сериалида Султон Сулаймон ролини ижро этган Ҳалит Эргенч ва унинг рафиқаси актриса Бергузар Корел 2009 йилда турмуш қурган. Улар биргаликда икки фарзанди — 11 ёшли Али ва бир ярим яшар Хонни тарбиялаб келмоқда. Яқинда бахтиёр жуфтлик оиласига яна бир меҳмон ташриф буюриши маълум қилинди.
2021 йил 10 октябрь куни юлдузли жуфтлик барча қариндошлари ва яқин дўстларини «baby shower» зиёфатига таклиф қилди. Байрамда актриса Бергузар оқ либосда пайдо бўлди. Улар уйининг шафтоли рангда безатилган меҳмонхонасида унутилмас лаҳзаларни кадрга муҳрлади.
Зиёфат учун ясатилган катта столдан ҳашаматли оқ торт ва мазали пирожнилар ўрин олган. Шунингдек, атроф ранг-баранг шар, гулчамбар ва болалар ўйинчоқлари билан безатилган.
Корел зиёфатда яқинлари ва дўстлари билан суратга тушди. Лекин Ҳалитнинг рафиқасини қучоқлаб тушган сурати энг романтик кадрлардан бири бўлди.
«Худога аён, мен буни жуда хоҳлагандим. Оиламиз бундан ҳам катта ва бахтли бўлишини истайман. Ҳа, фарзандимиз қиз бўлади! Биз унга Лейла деб исм танладик. Оилам, дўстларим, барчаси мен учун хурсанд. Биз қизимиз бўлиши ҳақидаги янгиликдан хабар топишимиз билан қувончимизни сиз билан баҳам кўрмоқчи бўлдик», — деб ёзади актриса ўз саҳифасида.
Постга берилган изоҳларда мухлислар юлдуз жуфтликни бўлажак янги меҳмон билан табриклади. Улар Корелга чексиз саломатлик ва муваффақиятли туғруқни тилаб қолди.
«Сиз қанчалар гўзал ва нурлисиз, бахтдан юзингиз порламоқда», «Қизим, бу жуда яхши янгилик, сизлар чақалоқни хоҳлаган эдингиз», «Табриклайман, қандай бахт. Сиз ва бўлажак фариштангизда ҳаммаси яхши бўлсин», — дея фолловерлар томонидан тилаклар билдирилган.
Эслатиб ўтамиз, Эргенч ва Корел «1001 кеча» сериалининг суратга олиш майдончасида учрашган. Ҳалит севгиси учун турмуш ўртоғи билан ажрашишга мажбур бўлди ва Корел билан бахтини топди.
Изоҳ (0)