Тинчлик бўйича Нобель мукофотига Россиянинг «Новая газета» нашри бош муҳаррири Дмитрий Муратов ва филиппинлик журналист, Rapple мухолифатчи сайти раҳбари Мария Ресса сазовор бўлди, деб ёзади «РБК».

Фото: ABC News

Нобель мукофоти уларга «демократия ҳамда барқарор тинчлик ўрнатилишининг дастлабки шарти бўлган фикр билдириш эркинлигини ҳимоя қилиш бўйича интилишлари» учун берилган.

«Ресса хоним ва жаноб Муратов Филиппин ва Россияда сўз эркинлиги учун мардонавор курашлари эвазига Тинчлик бўйича мукофотни қўлга киритади. Айни вақтда улар демократия ва матбуот эркинлиги тобора ноқулай шароитларга тўқнаш келаётган дунёда ушбу олий мақсадни ҳимоя қилаётган барча журналистларнинг вакиллари ҳисобланади», — дейилади Нобель мукофоти топширилиши ҳақидаги пресс-релизда.

Россияликлар орасида Муратовдан аввал физик олим Константин Новоселов Нобель мукофотига сазовор бўлган эди. Айни пайтда у Буюк Британияда яшайди, мукофотни эса 2010 йилда олган. Тинчлик бўйича Нобель мукофоти шу пайтгача бирорта ҳам Россия фуқаросига насиб этмаган, аммо у собиқ иттифоқнинг икки фуқаросига — олим ва ҳуқуқ ҳимоячиси Андрей Сахаровга ҳамда СССР президенти Михаил Горбачёвга топширилган.

Ўтган йили тинчлик бўйича Нобель мукофоти очликка қарши курашувчи энг йирик гуманитар ташкилот бўлган Жаҳон озиқ-овқат дастурига берилган эди.

Тинчлик мукофоти — Нобель мукофотлари орасида совриндорлар Стокгольмда эмас, Ослода эълон қилинадиган ва тақдирланадиган ягонаси.

11 октябрь куни иқтисодиёт бўйича мукофот совриндорлари эълон қилинганидан кейин Нобель ҳафталиги якунланади.

Аввалроқ физиология ва тиббиёт, физика, кимё, адабиёт йўналишлари бўйича 2021 йилги Нобель мукофотининг соҳиблари аниқланганди.

Мукофотни топшириш маросими 10 декабрь — Альфред Нобель вафот этган кунда бўлиб ўтади. Одатда Нобель мукофоти совриндорларини Швеция қироли Стокгольмда шахсан табрикларди (Ослода тақдирланадиган Тинчлик мукофоти совриндорлари бундан мустасно). Бироқ коронавирус пандемияси туфайли 2021 йилда худди ўтган йилги каби тантанали маросим ва зиёфат бўлмайди. Ғолиблар онлайн тарзда тақдирланади.