Суриштирувчи журналистлар халқаро консорциуми (ICIJ) 3 октябрь куни «Пандора архиви» (The Pandora Papers) ҳужжатлар тўпламини эълон қилди. Жаҳоннинг 117 мамлакатидан бўлган 150 дан зиёд ОАВларнинг 650 дан ортиқ журналистлари ўнлаб амалдаги ва собиқ давлат раҳбарлари ва уч юздан зиёд амалдорлар фигурант бўлган миллионлаб файлларни ўрганиб чиқди, деб ёзмоқда «Gazeta.uz» BBCга таяниб.
«Архив»да жами 11,9 миллион (қарийб 3 терабайт) ҳужжат ўрин олган бўлиб, ҳажми бўйича аввалги сиздирилган ахборотлар, жумладан, «Панама архиви»дан ҳам катта (унда фақат битта офшор регистраторининг ҳужжатлари жамланган, «Пандора архиви»да — 14 та).
Ўзбекистоннинг тилга олиниши
The Guardian ва BBC Panorama қўшма тадқиқотида айтилишича, «Пандора архиви»да британиялик тадбиркор, телекоммуникация магнати ва Буюк Британия консерватив партиясининг йирик донорларидан бири Муҳаммад Амерсининг Ўзбекистон билан алоқаси қайд этилган. У 2007—2013 йилларда Швециянинг Telia компанияси маслаҳатчиси бўлган. Ушбу компания коррупцияга қарши тергов доирасида АҚШ ва Голландия расмийларига 965 миллион доллар тўлаган.
Сиздирилган маълумотларга кўра, Амерси 2010 йилда номаълум офшор компанияга 220 миллион долларлик баҳсли тўловга алоқадор бўлган. Фирма Ўзбекистон Биринчи Президентининг қизи Гулнора Каримова назоратида бўлган, тўлов эса кейинчалик АҚШ ҳукумати томонидан «220 миллион доллар миқдоридаги пора» деб топилган.
Уларнинг қўшимча қилишича, Амерси битимнинг бошқа иштирокчилари виждонан иш тутишига ишонган ва бу пора бўлиши мумкин, деб ўйлашига асос бўлмаган. Бундан ташқари, уларнинг сўзларига кўра, унинг вазифаси фақат битимни тузиш ва баҳони тасдиқлаш бўлган, қолаверса, вақт ва кўлам жиҳатидан ҳам чекланган бўлган.
The Guardian и BBC’нинг аниқлашича, Муҳаммад Амерси бу иши учун 6 йил давомида 65 миллион доллар олган. Нашр ходимлари ички электрон почта минглаб саҳифаларини, суд ҳужжатлари, ҳисоб-фактуралар, корпоратив файллар ва ички ҳисоботларни кўриб чиққан ҳамда Амерсининг Telia’нинг Марказий Осиёдаги роли билан таниш бўлган кўплаб манбалар билан суҳбатлашган.
Суриштирувда, шунингдек, «МТС Ўзбекистон» уяли алоқа операторининг собиқ бош директори Беҳзод Аҳмедов ҳам тилга олинган, у кейинчалик АҚШда «коррупцион схема»да иштирок этганликда айбланган.
Нашр маълумотларига кўра, Аҳмедов Амерси билан Telia компанияси Ucell уяли алоқа операторининг 20 фоизлик улушини мамлакатда ишлаш учун зарур бўлган телекоммуникация хизматлари лицензияларини олиш ва янгилаш эвазига Гибралтарнинг офшор компаниясидан сотиб олиш режасини муҳокама қилган. Шартнома тузилганидан бир неча ҳафта ўтиб, Амерси ўзининг офшор фирмаси орқали Швейцариядаги банк ҳисоб рақамига 500 минг доллар ўтказган. Ҳисоб-фактурада тўлов Project Uzbekistan/Таkilant (Таkilant — беинифициари Гулнора Каримова бўлган Гибралтар компанияси номи) учун тўлангани кўрсатилган.
Архив маълумотларига кўра, Ўзбекистондаги айрим тадбиркорлар офшор компания сифатида Ирландия ва Буюк Британияда рўйхатдан ўтган фирмалардан фойдаланади, деб қайд этган The Irish Times.
Икки корхона — 2016 йилда Шотландияда рўйхатга олинган Тrontex ва Gratum Trading — 2017 йилги Президент фармонида Сирдарё вилоятида пахта етиштириш ва тўқимачилик кластерини бошқарувчи Bek Cluster қўшма корхонасининг хорижий шериклари сифатида кўрсатилган. Bek Cluster’нинг раҳбари ва таъсисчиларидан бири — сенатор Улуғбек Сотиболдиев, хорижий шериклар энди қўшма корхонада ҳисобга олинмаган.
«Архив»да яна кимлар қайд этилган?
«Пандора архиви»га кўра, Буюк Британия собиқ бош вазири Тони Блэр рафиқаси Шери Блэр раҳбарлик қилувчи компанияга кўчмас мулк сотиб олган. Улар Баҳрайн саноат ва туризм вазирининг оиласидан кўчмас мулк соҳасида фаолият юритувчи офшор компаниясини сотиб олади. Ҳисобот муаллифларининг қайд этишича, бино ўрнига компания акцияларини сотиб олган Блэр шартномани шундай расмийлаштирадики, 400 минг доллардан ортиқ мол-мулк солиғини тўлашга тўғри келмайди.
Текширувда қайд этилишича, Чехия бош вазири Андрей Бабиш Британиянинг Виржин оролларидаги компания орқали муҳташам бино — Франциянинг Мужен шаҳрида жойлашган Биго қасрини сотиб олган. Ушбу қасрдaн ташқари, Бабишнинг Муженда яна иккита кўчмас мулки, шу жумладан, вилласи бор.
Сербия президенти Александр Вучичнинг яқин дўсти ва сафдоши бўлган Белграднинг собиқ мэри Синиса Мали 2015 йилда Болгариянинг Қора денгиз соҳилидаги 6,1 миллион долларлик ҳашаматли турар -жой мажмуасида 24 та хонадонга эгалик қилишини рад этган. Аммо журналистлар буни исботлашга муваффақ бўлди.
«Архив»да айтилишича, Иордания қироли Абдулла II 2003—2017 йилларда Буюк Британия ва АҚШдаги қимматбаҳо кўчмас мулкларга 100 миллион доллардан ортиқ пул сарфлаган. У мамлакатга раҳбарлик қилган 1999 йилдан бошлаб 15 та уй сотиб олиш учун фирмалар тармоғидан фойдаланган. Иордания монархи идораси 3 октябрь куни бу маълумотлар «янги ва сир эмаслигини» билдирган.
«Пандора архиви», шунингдек, Украина президенти Владимир Зеленский ва унинг «Студия Квартал 95»даги шериклари офшор компаниялар тармоғининг бенефициарлари бўлганидан гувоҳлик бермоқда. Бу компанияларнинг пуллари Лондоннинг ҳашаматли кўчмас мулкига сармоя қилинган. 2019 йилги сайловлар олдидан Зеленский ўз улушини бизнес шериги ва амалдаги ёрдамчиси Сергей Шефирга ўтказган.
Собиқ иттифоқ мамлакатларининг бошқа раҳбарларидан, ҳужжатларда (шахсан ўзи ёки уларнинг яқинлари) Владимир Путин, Нурсултон Назарбоев ва Илҳом Алиев ҳам тилга олинган.
Изоҳ (0)