Грузиянинг собиқ президенти Михаил Саакашвили қамоқ жазосини ватанида ўтайди, Тбилиси уни Киевга топширмоқчи эмас. Бу ҳақда Грузия бош вазири ўринбосари ҳамда маданият, спорт ва ёшлар ишлари вазири Тея Сулукани маълум қилди. Аввалроқ Украина президенти Владимир Зеленский мамлакат расмийлари Саакашвилини Украинага қайтариш учун бор имкониятини ишга солишини айтганди, чунки у Украина фуқаролигига эга.

Фото: Видеодан кадр

«Агар Саакашвилини Украинага топшириш ҳақида гапирадиган бўлсак, биз унинг Грузия суди томонидан тайинланган қамоқ муддатини Украинада ўташини истамаймиз. Бунинг қонуний жиҳатдан мақсадга мувофиқлиги йўқ», — деди Сулукани хоним ҳукумат йиғилишидан кейинги брифингда, у собиқ президентнинг Грузия қамоқхонасида сақланишини қўшимча қилди.

Михаил Саакашвили 2008—2013 йилларда Грузия президенти бўлган. У президентлик муддати тугашига оз қолган вақтда мамлакатдан чиқиб кетган. Шундан кейин унга нисбатан тўртта жиноий иш очилган, улардан иккитаси бўйича 2018 йилда суд ҳукми ҳам ўқилган.

Саакашвили Украина собиқ президенти Пётр Порошенконинг 2015 йил майдаги фармонига мувофиқ Украина фуқаролигини олган, сўнг Одесса вилоятининг губернатори этиб тайинланган. Бироқ 2016 йил ноябрь ойида у ўз лавозимидан истеъфога чиқди ҳамда ўз сиёсий кучини яратиш ва Олий Радага муддатидан олдин сайловлар ўтказиш ниятини эълон қилди. 2017 йил июль ойида Порошенко Саакашвилини Украина фуқаролигидан маҳрум қилди, лекин 2019 йил май ойида янги президент Владимир Зеленский Пётр Порошенко фармонига ўзгартириш киритиб, Саакашвилига фуқаролигини қайтарди. 2020 йил май ойида Зеленский Саакашвилини Ислоҳотлар Ижроия қўмитасига раҳбар этиб тайинлади.

Сентябрь охирида Саакашвили Грузияга қайтишни ваъда қилганди. 1 октябрь куни у мамлакатга келганини билдирди. Саакашвилини ҳибсга олишни ваъда берган Грузия ҳукумати аввалига собиқ президентнинг мамлакатга қайтганини расман тасдиқламаганди. Кейинроқ мамлакат бош вазири собиқ президентнинг ҳибсга олинганини эълон қилди.

Саакашвили келганидан сўнг, Грузия Ички ишлар вазирлиги унга қарши чегарани ноқонуний кесиб ўтиш бўйича яна бир жиноий иш очган. Тбилиси яқинидаги қамоқхонага жойлаштирилган сиёсатчи у ерда очлик эълон қилди ва Украина консули билан учрашишни талаб қилди. Украина ташқи ишлар вазири Дмитрий Кулеба ва президент Владимир Зеленский Саакашвилини қўллаб-қувватлашга ваъда берганди.