Gruziyaning sobiq prezidenti Mixail Saakashvili qamoq jazosini vatanida o‘taydi, Tbilisi uni Kiyevga topshirmoqchi emas. Bu haqda Gruziya bosh vaziri o‘rinbosari hamda madaniyat, sport va yoshlar ishlari vaziri Teya Sulukani ma’lum qildi. Avvalroq Ukraina prezidenti Vladimir Zelenskiy mamlakat rasmiylari Saakashvilini Ukrainaga qaytarish uchun bor imkoniyatini ishga solishini aytgandi, chunki u Ukraina fuqaroligiga ega.
“Agar Saakashvilini Ukrainaga topshirish haqida gapiradigan bo‘lsak, biz uning Gruziya sudi tomonidan tayinlangan qamoq muddatini Ukrainada o‘tashini istamaymiz. Buning qonuniy jihatdan maqsadga muvofiqligi yo‘q”, — dedi Sulukani xonim hukumat yig‘ilishidan keyingi brifingda, u sobiq prezidentning Gruziya qamoqxonasida saqlanishini qo‘shimcha qildi.
Mixail Saakashvili 2008—2013-yillarda Gruziya prezidenti bo‘lgan. U prezidentlik muddati tugashiga oz qolgan vaqtda mamlakatdan chiqib ketgan. Shundan keyin unga nisbatan to‘rtta jinoiy ish ochilgan, ulardan ikkitasi bo‘yicha 2018-yilda sud hukmi ham o‘qilgan.
Saakashvili Ukraina sobiq prezidenti Pyotr Poroshenkoning 2015-yil maydagi farmoniga muvofiq Ukraina fuqaroligini olgan, so‘ng Odessa viloyatining gubernatori etib tayinlangan. Biroq 2016-yil noyabr oyida u o‘z lavozimidan iste’foga chiqdi hamda o‘z siyosiy kuchini yaratish va Oliy Radaga muddatidan oldin saylovlar o‘tkazish niyatini e’lon qildi. 2017-yil iyul oyida Poroshenko Saakashvilini Ukraina fuqaroligidan mahrum qildi, lekin 2019-yil may oyida yangi prezident Vladimir Zelenskiy Pyotr Poroshenko farmoniga o‘zgartirish kiritib, Saakashviliga fuqaroligini qaytardi. 2020-yil may oyida Zelenskiy Saakashvilini Islohotlar Ijroiya qo‘mitasiga rahbar etib tayinladi.
Sentabr oxirida Saakashvili Gruziyaga qaytishni va’da qilgandi. 1-oktabr kuni u mamlakatga kelganini bildirdi. Saakashvilini hibsga olishni va’da bergan Gruziya hukumati avvaliga sobiq prezidentning mamlakatga qaytganini rasman tasdiqlamagandi. Keyinroq mamlakat bosh vaziri sobiq prezidentning hibsga olinganini e’lon qildi.
Saakashvili kelganidan so‘ng, Gruziya Ichki ishlar vazirligi unga qarshi chegarani noqonuniy kesib o‘tish bo‘yicha yana bir jinoiy ish ochgan. Tbilisi yaqinidagi qamoqxonaga joylashtirilgan siyosatchi u yerda ochlik e’lon qildi va Ukraina konsuli bilan uchrashishni talab qildi. Ukraina tashqi ishlar vaziri Dmitriy Kuleba va prezident Vladimir Zelenskiy Saakashvilini qo‘llab-quvvatlashga va’da bergandi.
Mavzuga doir:
Izoh (0)