Hokim sifatidagi birinchi maoshini kambag‘allarga bergan G‘uzor tumani hokimi Bekzod Suyunov sektor rahbarlari orasida uchinchi o‘rinni qo‘lga kiritgani uchun o‘ziga berilgan 5 million so‘m mukofot pulini ham ehtiyojmandlarga ilindi. Bu haqda tuman hokimligi axborot xizmati ma’lum qildi.
Qayd etilishicha, Bekzod Suyunov sektor rahbari sifatida erishgan yutuqlari sabab viloyatdagi 60 ta sektor rahbari orasida 3-o‘rinni egallagan. Unga buning uchun viloyat hokimi Zoir Mirzayev tomonidan 5 million so‘m pul mukofoti berilgan.
“Tuman hokimi 27-sentabr kuni ushbu 5 million so‘m pul mukofotini ikki nafar farzandi bilan 25 yildan beri ijarada yashab kelayotgan Marziya Ergashevaga hadya qilib, uy-joy qurishda ko‘maklashmoqchiligini bildirdi”, — deydi hokimning matbuot kotibi Xudoyberdi Yo‘ldoshev.
Qo‘shimcha qilinishicha, hokim fuqaro turar joy qurilishini boshlasa, yana qurilish materiallaridan ham yordam qilishini ma’lum qilgan.
“Bu sovg‘adan xursand bo‘lgan Marziya opa ko‘zida yosh bilan Prezidentimiz va mutasaddilarga minnatdorchilik bildirdi”, — deyiladi hokimlik rasmiy Telegram kanalidagi axborotda.
Viloyat hokimligi axborot xizmatining qayd etishicha, viloyatda sektor rahbarlari o‘rtasida bo‘lib o‘tgan o‘zaro bellashuvda Koson tumani hokimi Asrol Boyqarayev birinchi o‘rinni qo‘lga kiritib, 15 million so‘m pul muokofti bilan, Nishon tumani hokimi Muxtor Hayitmurodov esa ikkinchi o‘rinni qo‘lga kiritib, 10 million so‘m pul mukofoti bilan taqdirlangan.
Mavzuga doir:
- “Biri 10 ta oilani qaramog‘iga oldi, ikki nafari esa oyligini jamg‘armaga o‘tkazdi”. Prezident tashabbusini yoqlagan qashqadaryolik hokimlar
- “Avval bo‘sh vaqtimiz bo‘lmagani sababmi, dastlabki to‘rt kunda zerikkandek bo‘ldik”. Ta’tilga chiqqan qashqadaryolik hokimlar ta’til qanday o‘tayotgani haqida
Izoh (0)