Тошкентда 3 нафар йўловчи аёлга шилқимлик қилган такси ҳайдовчиси 5 суткага қамалди

Тошкентда такси ҳайдовчиси 3 нафар йўловчи аёлга шилқимлик қилгани ҳақида хабар берилганди. 22 сентябрь куни ушбу ҳайдовчига суд ҳукми ўқилди, деб хабар беради «Nemolchi.uz».

Маълум қилинишича, аёлларга машинасида массаж таклиф қилган эркак беш суткалик қамоқ жазосига ҳукм қилинган.

Суд мажлисида иштирок этган жабрланувчилардан бири ҳукмдан мамнун эканини айтди. Унинг сўзларига кўра, такси ҳайдовчисининг ҳаёти остин-устун бўлиб кетган.

«Такси ҳайдовчиси, албатта, кечирим сўради ва йиғлаб юборди. Хотини юрагидаги муаммоси сабаб реанимацияда. Yandex (Yandex.Go — таҳр.) уни уч йилга блоклади. Ижарага олинган машинасини эгаси олиб кетди.

Биз ҳукмдан мамнунмиз: шу 24 соат ичида унинг бутун ҳаёти кўз олдидан ўтди. Ишонаманки, тақдир уни тўлиқ жазолади. Бу курашнинг бошланиши эди. Муҳими, одамлар энди бундай ҳолатларда жим кетмаяпти», — деди жабрланувчилардан бири.

Бундан аввал Тошкент метрополитенида 13 ёшли қизга беҳаё ҳаракатлар қилган шахс ушлангани ва жиноят иши қўзғатилгани ҳақида хабар берилганди.