«Дарё»да дарс соатларини сотишга уринган мактаб директори қилмиши фош этилгани юзасидан мақола эълон қилинган эди. Ғузор туман ҳокимлиги ахборот хизматининг маълумот беришича, мазкур иш юзасидан терговга қадар текширув ҳаракатлари бошланган.
«Ушбу видеолавҳада Қашқадарё вилояти Ғузор туманидаги 49-мактаб директори дарс соатини сотишга уринганлиги маълум қилинган. Мазкур хабар жорий йилнинг 25 сентябрь куни Ғузор тумани прокуратурасининг жиноят ҳақидаги ариза ва хабарларни рўйхатга олиш китобига қайд этилиб, ушбу ҳолат юзасидан терговга қадар текшириш ҳаракатлари ташкил қилинган», — дейилади ҳокимлик ахборот хизмати берган маълумотда.
Мазкур мақолага вилоят халқ таълими бошқармаси ахборот хизмати ҳам муносабат билдириб, мансабдор ўз мансабидан фойдаланиб, ноқонуний мукофот, ҳадялар олишга ружу қўйиш ҳолатини қоралашини маълум қилган.
«‘Daryo.uz’ сайтида эълон қилинган ‘Учта ‘кал’ берасан, дарсларни бир кунга қўйиб бераман’, сарлавҳали мақола вилоят халқ таълими бошқармаси ва ҳуқуқни муҳофаза қилувчи органлар томонидан ўрганилмоқда. Мансабдор ўз мансабидан фойдаланиб, ноқонуний мукофот-ҳадялар (аниқроғи, пора) олишга ружу қўйиш ҳолатини вилоят халқ таълими бошқармаси батамом қоралайди. Мактаб директорлари ва педагог жамоаларга коррупция ва унинг оғир иллатлари юзасидан тегишли масъуллар иштирокида бир қатор тарғибот ишлари амалга ошириб келинаётганлигини маълум қиламиз», — дейди бошқарма ахборот хизмати раҳбари Жавоҳир Рустамов.
Эслатиб ўтамиз, аввалроқ 49-мактаб директори Фахриддин Холиқовнинг мактабдаги 10 соат информатика дарсини дарс ўтиш иштиёқида борган ўқитувчига 300 долларга пуллашга урингани, қилмишини изоҳлаганда эса буни «Адашганман, аммо ўша пулни олмаганман», дея изоҳлагани хабар қилинганди.
Изоҳ (0)