Toshkent metropolitening “Olmazor” bekatida 2021-yilning 18-sentabr kuni voyaga yetmagan shaxsga nisbatan behayo harakatlar sodir etib, qidirilayotgan shaxs qo‘lga olindi, deya xabar qilmoqda IIB matbuot kotibi Shohruh G‘iyosov.

Foto: Telegram / Shohruh G‘iyosov

Qo‘lga olingan shaxs ilgari Jinoyat kodeksining 166-(talonchilik), 169-(o‘g‘rilik) hamda 127-(voyaga yetmagan shaxsni g‘ayriijtimoiy xatti-harakatlarga jalb qilish) moddalarida ko‘rsatilgan jinoyatlarni sodir etgani uchun sudlangan, Toshkent shahrining Olmazor tumanida yashovchi, 1989-yilda tug‘ilgan fuqaro K.Sh. ekani aniqlandi.

Hozirda IIV Transport va turizm obyektlarida xavfsizlikni ta’minlash departamenti tomonidan mazkur shaxsning harakatlarida voyaga yetmagan shaxsga nisbatan uyatsiz-buzuq harakatlar sodir etish jinoyatining alomatlari mavjudligi tekshirilmoqda.

“Hurmatli fuqarolar, agar siz yoki yaqinlaringiz ushbu fotosuratda ko‘rsatilgan shaxsning harakatlaridan jabrlangan bo‘lsangiz, darhol 102 raqamiga yoki yaqin oradagi ichki ishlar organiga xabar berishingiz so‘raladi”, – deyiladi matbuot kotibi xabarida.