Инвестициялар ва ташқи савдо вазири Сардор Умрзоқов 26 сентябрь куни Тошкентга ташриф буюрган Россия иқтисодий ривожланиш вазири Максим Решетников билан Ўзбекистоннинг Жаҳон савдо ташкилоти (ЖСТ)га аъзо бўлишга тайёргарлик кўриш масаласини муҳокама қилди.
Россия Иқтисодий ривожланиш вазирлиги матбуот хизматининг ёзишича, Максим Решетников бу борада ўзбекистонлик ҳамкасбларига ҳар томонлама экспертлик кўмагини беришга тайёрлигини билдирган. Учрашув якунларига кўра, декабрь ойида Ўзбекистоннинг ЖСТга аъзо бўлиши бўйича ишчи гуруҳ йиғилиши ўтказилиши тўғрисида қарор қабул қилинди.
Инвестициялар ва ташқи савдо вазирлиги хабарида қайд этилишича, суҳбат давомида 2020 йилнинг октябрь ойида Бухоро шаҳрида бўлиб ўтган Ўзбекистон—Россия Ҳукуматлараро комиссиянинг 21-йиғилиши баённомасида белгиланган икки мамлакат ўртасидаги иқтисодий шерикликни чуқурлаштириш чора-тадбирлари бажарилишининг мониторинги ҳам муҳокама қилинган. Мавжуд масалалар атрофлича таҳлил этилиб, тегишли соҳаларда амалий ҳамкорликни янада кучайтиришга оид чора-тадбирлар ишлаб чиқилган.
Изоҳ (0)