Чад ўтиш даври ҳарбий кенгаши мамлакат парламенти ташкил этилганини эълон қилди. Унга Ўтиш даври миллий кенгаши деб ном берилган.
Фото: EPA
Ҳарбий кенгаш раҳбари Маҳамат Идрис Дебининг сўзларига кўра, парламент таркиби 93 кишидан ташкил топган. Янги парламент Чад муваққат ҳукуматининг ўтиш давридаги фаолиятини назорат қилиши керак бўлади.
Чадни 1996 йилдан буён бошқариб келган президент Идрис Деби 2021 йилнинг апрелида мамлакат шимолидаги исёнчиларга қарши жанг пайтида олган жароҳатларидан вафот этганди.
Президент вафотидан кейин ҳокимиятга келган ҳарбийлар чегараларни ёпиб қўйди. Шунингдек, армия мамлакатда комендантлик соати эълон қилди. Деби вафотидан кейин Чад ҳукумати ва парламенти тарқатиб юборилди. Кейинги 18 ой давомида мамлакатни ҳарбий кенгаш бошқариши маълум қилинди. Унга марҳум президентнинг ўғилларидан бири, 37 ёшли генерал, президент гвардияси қўмондони Маҳамат Идрис Деби Итно бошчилик қилди.
Идрис Деби Итно Африкада ҳукуматни энг узоқ вақт бошқарган раҳбарлардан бири. У 1990 йилги қўзғолон натижасида ҳокимиятга келган. Унинг ҳукмронлиги даврида мухолифат президентни репрессияда айблаган. Reuters хабарига кўра, 2018 йилда Деби конституциявий ислоҳотни амалга оширган, бу унга 2033 йилгача ҳокимиятда қолишига имкон берганди. Ғарб давлатларида, шу жумладан, Францияда Деби исломий экстремистик гуруҳларга қарши курашда иттифоқдош сифатида кўрилган.
