Ўзбекистонда 20—30 сентябрь кунлари 4—5 ёшли болалар полиомиелитга қарши оммавий вакцинациядан ўтказилади. Бу ҳақда Санитария-эпидемиология фаровонлиги ва аҳоли саломатлиги хизматига таяниб, «Gazeta.uz» хабар берди.
Вакциналарни мамлакатнинг даволаш-профилактика муассасалари эмлаш пунктида олиш мумкин. Болаларни эмлаш учун ҳудудларга 1,2 миллион доза инактивланган полиомиелит вакцина етказиб берилган.
ИПВ-инактивланган полиомиелит вакцинаси билан болалар 4 ойда бир маротаба эмланади. Эмлаш бир маротабалик шприс билан инъекция усулида ўтказилади, вакцинанинг бир дозаси — 0,5 мл мушак орасига юборилади.
Фарғона вилояти СЭО ва ЖС хизмати Жаҳон соғлиқни сақлаш ташкилотининг расмий маълумотларига таяниб, Афғонистон ва Тожикистонда сентябрь ойида 31 та ҳолатда полиомиелит вирусининг 2-типи аниқланганини маълум қилганди.
СЭО хизмати вакциналар ва иммунопрофилактика бўлими бошлиғи Дилором Турсунова берган изоҳга кўра, Ўзбекистонда охирги маротаба полиомиелит ҳолати 1995 йил Қорақалпоғистонда аниқланган. «1996 йилдан бери республикада полиомиелит ҳолатлари учрамаган. ЖССТ тавсияларига мувофиқ 1997 йилдан бошлаб мамлакатга полио вирус кириб келишининг олдини олиш учун полиомелит ва ўткир параличлар бўйича фаол эпидемиологик кузатув олиб борилмоқда», — дейди у.
Шу йилнинг март ойида Тожикистон ва Афғонистонда полиомиелит ҳолатлари аниқланганлиги сабабли Сурхондарё вилоятида 5 ёшгача бўлган болалар ўртасида оммавий эмлаш ўтказилган.
Полиомиелит нима?
ЖССТ маълумотларига кўра, полиомиелит вируслар келтириб чақирадиган юқори инфекцияли касаллик. Касаллик асаб тизимини шикастлайди бир неча соатларда умумий фалажликка олиб келиши мумкин. Полиомиелит билан асосан 5 ёшгача бўлган болалар касалланади.Вирус ифлосланган озиқ-овқат маҳсулотлари ва сув орқали ўтади, ичакда кўпаяди ва у ердан асаб тизимига ўтиши мумкин. Инфекцияланган кишиларнинг аксариятида касаллик аломатлари бўлмайди, лекин вирус уларда ахлат орқали чиқиб кетади ва шу орқали у бошқа одамларга юқиши мумкин.
Инфекцияга чалинишнинг ҳар 200 та ҳолатидан бирида умрбод фалажлик (асосан оёқларда) юзага келади. Иситма, толиқиш, бош оғриғи, қайд қилиш, оёқ-қўллардаги оғриқлар, бўйин қотиб қолиши унинг дастлабки аломатларидир.
Полиомиелит бедаво, уни фақат эмлаш орқали олдини олиш мумкин. Бир неча маротаба юборилган вакцина болани деярли бутун умри давомида ҳимоя қилади.
Эслатиб ўтамиз, Ўзбекистон болаларни полиомиелитдан ҳимоя қилиш мақсадида 2018 йилда 4 ойлик болаларга қилинадиган инактивлаштирилган полиомиелит вакцинаси (ИПВ) татбиқ этилганди.
Изоҳ (0)