Тошкент аэропортида «Тошкент-Аэро» ихтисослаштирилган божхона комплекси ходимлари томонидан салкам 800 грамм тилла тақинчоқларни шарбат тайёрлаш қурилмасига солиб, уни Ўзбекистонга олиб кирмоқчи бўлган йўловчи қўлга олинди. Бу ҳақда «Дарё»га Божхона қўмитаси ахборот хизмати бош инспектори Ҳусан Тангриев хабар берди.
Таъкидланишича, Тошкент халқаро аэропортида Истанбул—Тошкент рейси бўйича парвозини якунлаган йўловчилардан бирининг божхонадан «яшил» йўлак орқали ўтаётганда шубҳали ҳаракатлари божхона ходимларининг диққатини тортган. Унга тегишли багаж белгиланган назорат-рентген ускунаси орқали кўздан кечирилган. Багаждаги шарбат тайёрлаш қурилмасининг темир асосли таг қисми махсус ускуна ёрдамида кесиб, очиб кўрилган. Қурилма ичида қиймати 320 миллион сўмга тенг, жами 799 грамм оғирликдаги қимматбаҳо тилла тақинчоқлар яширилгани аниқланган.
«Тошкент халқаро аэропортида аниқланган кейинги ҳолатлардан яна бири фуқаро Н.Х. Истанбулга парвози олдидан чўнтагидаги 1 дона тилла соатни божхона назоратига тақдим қилмаган ҳолда самолётга олиб чиқаётганда тўхтатиб қолинди. Тилла соатнинг ичида 1 дона тилла қуйма бўлаги яширилгани ошкор бўлди. 133,4 грамм оғирликдаги тилла соат ва тилла қуйманинг қиймати 25 миллион сўмга тенглиги аниқланди», — деди Ҳусан Тангриев.
Изоҳ (0)