Toshkent aeroportida “Toshkent-Aero” ixtisoslashtirilgan bojxona kompleksi xodimlari tomonidan salkam 800 gramm tilla taqinchoqlarni sharbat tayyorlash qurilmasiga solib, uni O‘zbekistonga olib kirmoqchi bo‘lgan yo‘lovchi qo‘lga olindi. Bu haqda “Daryo”ga Bojxona qo‘mitasi axborot xizmati bosh inspektori Husan Tangriyev xabar berdi.
Ta’kidlanishicha, Toshkent xalqaro aeroportida Istanbul—Toshkent reysi bo‘yicha parvozini yakunlagan yo‘lovchilardan birining bojxonadan “yashil” yo‘lak orqali o‘tayotganda shubhali harakatlari bojxona xodimlarining diqqatini tortgan. Unga tegishli bagaj belgilangan nazorat-rentgen uskunasi orqali ko‘zdan kechirilgan. Bagajdagi sharbat tayyorlash qurilmasining temir asosli tag qismi maxsus uskuna yordamida kesib, ochib ko‘rilgan. Qurilma ichida qiymati 320 million so‘mga teng, jami 799 gramm og‘irlikdagi qimmatbaho tilla taqinchoqlar yashirilgani aniqlangan.
“Toshkent xalqaro aeroportida aniqlangan keyingi holatlardan yana biri fuqaro N.X. Istanbulga parvozi oldidan cho‘ntagidagi 1 dona tilla soatni bojxona nazoratiga taqdim qilmagan holda samolyotga olib chiqayotganda to‘xtatib qolindi. Tilla soatning ichida 1 dona tilla quyma bo‘lagi yashirilgani oshkor bo‘ldi. 133,4 gramm og‘irlikdagi tilla soat va tilla quymaning qiymati 25 million so‘mga tengligi aniqlandi”, — dedi Husan Tangriyev.
Izoh (0)