Наманганда 5 нафар фарзанди учун алимент тўловларидан бўйин товлаб келаётган отага нисбатан суд ҳукм чиқарди. Бу ҳақда «Дарё» мухбири Азизбек Абдувалиев хабар бермоқда.
Наманганлик Рустам Жумаев (исм-шарифлар ўзгартирилган) уч маротаба уйланиб, турли сабаблар билан ажралишиб кетган. Фуқаролик ишлари бўйича суд буйруғига асосан биринчи турмуш ўртоғи фойдасига бир нафар, иккинчи турмуш ўртоғи фойдасига уч нафар, учинчи турмуш ўртоғининг фойдасига бир нафар, жами 5 нафар фарзанди учун вояга етгунларига қадар иш ҳақи ва бошқа даромадларидан алимент ундирилиши белгиланган.
Мазкур ижро ҳужжати МИБнинг Янги Наманган туман бўлими иш юритувига олинади ва қарздор отага нисбатан ижро иши қўзғатилади. Давлат ижрочиси томонидан Жумаевга алимент маблағларини ўз вақтида тўлаб бориши зарурлиги тушунтирилади. Бироқ у бу тушунтиришларни писанд қилмай, 5 нафар фарзандига алимент тўлашдан сурункасига бўйин товлаб келган. Қарздорлик суммаси эса жами ҳисобда қарийб 60 миллион сўмга етади.
Қарздор ота аввал ҳам алимент тўламагани учун дастлаб Жиноят кодексининг 122-моддаси 1-қисми, кейин эса айнан шу моддасининг 2-қисми билан жиноят иши қўзғатилиб, жазо муқаррарлиги таъминланди. Тўпланган ҳужжатлар судга юборилиб, якуний ҳукм чиқарилди. Жумаев айбли деб топилиб, 6 ой муддатга озодликдан маҳрум қилинди.
Изоҳ (0)