Namanganda 5 nafar farzandi uchun aliment to‘lovlaridan bo‘yin tovlab kelayotgan otaga nisbatan sud hukm chiqardi. Bu haqda “Daryo” muxbiri Azizbek Abduvaliyev xabar bermoqda.
Namanganlik Rustam Jumayev (ism-shariflar o‘zgartirilgan) uch marotaba uylanib, turli sabablar bilan ajralishib ketgan. Fuqarolik ishlari bo‘yicha sud buyrug‘iga asosan birinchi turmush o‘rtog‘i foydasiga bir nafar, ikkinchi turmush o‘rtog‘i foydasiga uch nafar, uchinchi turmush o‘rtog‘ining foydasiga bir nafar, jami 5 nafar farzandi uchun voyaga yetgunlariga qadar ish haqi va boshqa daromadlaridan aliment undirilishi belgilangan.
Mazkur ijro hujjati MIBning Yangi Namangan tuman bo‘limi ish yurituviga olinadi va qarzdor otaga nisbatan ijro ishi qo‘zg‘atiladi. Davlat ijrochisi tomonidan Jumayevga aliment mablag‘larini o‘z vaqtida to‘lab borishi zarurligi tushuntiriladi. Biroq u bu tushuntirishlarni pisand qilmay, 5 nafar farzandiga aliment to‘lashdan surunkasiga bo‘yin tovlab kelgan. Qarzdorlik summasi esa jami hisobda qariyb 60 million so‘mga yetadi.
Qarzdor ota avval ham aliment to‘lamagani uchun dastlab Jinoyat kodeksining 122-moddasi 1-qismi, keyin esa aynan shu moddasining 2-qismi bilan jinoyat ishi qo‘zg‘atilib, jazo muqarrarligi ta’minlandi. To‘plangan hujjatlar sudga yuborilib, yakuniy hukm chiqarildi. Jumayev aybli deb topilib, 6 oy muddatga ozodlikdan mahrum qilindi.
Izoh (0)