Kruse GWS кимошди уйи орқали америкалик машҳур қўшиқчи Элвис Преслининг кийими 1 миллион долларга сотилди, деб хабар беради «Korrespondent.net».
Қўшиқчининг комбинезон ва оқ рангли кейпи (ёпинғич) аукционга қўйилган. Мусиқачи айнан шу кийимда 1972 йили Нью-Йоркдаги Madison Square Garden спорт мажмуасида концерт берган. Металл қотиргичли эксклюзив кийимни Пресли учун дизайнер Билл Белю яратган.
Савдолар аввалида лот 350 минг долларга баҳоланган. Элвиснинг кийими учун бунча пулни берган инсоннинг шахси ошкор этилмаган.
Аукционда ушбу костюмдан ташқари, қўшиқчининг сочлари солинган банка, пойгачилар шлеми, смокинги, пойабзаллари, ноталар туширилган дафтари ва электроустараси сотилган.
Эслатиб ўтамиз, 2017 йилда Julien’s Auctions Элвис Преслига тегишли бўлган тўғноғични 205 минг долларга, 2020 йилда гитарасини 1,32 миллион долларга сотган эди.
Изоҳ (0)