ИИВ ЙҲХББ ижтимоий тармоқда ЙПХ ходимидан қочишга уринган Damas ҳайдовчининг қўлга олиниши тасвирланган видео юзасидан маълумот берди.
Ижтимоий тармоқларда Ургут туманида ЙПХ ходимлари таъқибидан қочган Damas ҳайдовчиси охири берк кўчага кириб қолиб, қўлга тушгани тасвирланган видео тарқалди.
Маълум қилинишича, 28 август куни соат 17:40 ларда туманнинг Навоий шоҳкўчасида ЙПХ ходими К.Рашидов томонидан Damas русумли автомобиль ҳайдовчисига тўхташ ишораси кўрсатилганига қарамай, ҳайдовчи тўхтамасдан ҳаракатда давом этган. ЙПХ ходими ва ушбу жойда хизмат олиб бораётган ИИБ соҳавий хизматлари ходимлари бошқа бир Damas русумли автомобилда бўйсунмай кетган ҳайдовчини кузатиб борган.
Ҳайдовчи тўхтагандан сўнг, ходимлар томонидан бўйсунмаслик ҳолатини бартараф қилиш чоралари кўрилган. ЙПХ ходими томонидан меъёрий ҳужжатлари тақдим қилиниши сўралганда, ҳайдовчи ҳужжатларини тақдим қила олмаган.
Ҳолат юзасидан тегишли тартибда баённома ва бошқа ҳужжатлар расмийлаштирилиб, автомобиль вақтинча сақлаш учун жарима майдонига қўйилган.
Аввалроқ Андижонда Spark капотида ЙПХ ходимини 60 метрча судраб кетган ҳайдовчига жиноят иши қўзғатилгани, Тошкентда ҳайдовчи аёл маст ҳолда деб гумон қилгани учун машина бошқаришга йўл қўймаган ЙПХ ходимини ҳақоратлагани тўғрисида хабар берилганди.
Изоҳ (0)