Кўча рассомининг ижод намунасида Chevrolet савдо белгиси остида автомобиллар ишлаб чиқарувчи UzAuto Motors компанияси монополиясига ишора қилиб, машина олиш учун узун навбат акс эттирилган. Шунингдек, навбат бошида турган инсоннинг қизил бош кийими «шапка» тизимига ишора қилади.
5 сентябрь куни ижтимоий тармоқларда мазкур стрит-артни ўчириш бўйича ишлар олиб борилаётгани тасвирланган видео тарқалди. Кейинроқ «Дарё» мухбири воқеа жойига бориб, стрит-артни ўчириш ҳаракати муваффақиятсиз тугаганини маълум қилганди. Кейинроқ @inkuzart Telegram’даги каналида стрит-артнинг катта қисми оқ бўёқ ёрдамида ўчириб ташлангани тасвирланган фотосуратни эълон қилди.
«Gazeta.uz»нинг ёзишича, UzAuto Motors компанияси томонидан 2021 йилнинг январь—июль ойларида 124,9 минг дона ёки ўтган йилнинг шу даврига нисбатан 25,9 фоиз ёхуд 43,8 мингта камроқ енгил автомобиль ишлаб чиқарган. Ишлаб чиқариш ҳажми камайишига глобал миқёсда микрочиплар тақчиллиги сабаб қилиб кўрсатилган.
Таъкидлаш керакки, UzAutoSavdo маълумотларига кўра, айни вақтда Lacetti харид қилиш учун навбатда турганлар сони 31 мингга, Cobalt учун 11 мингга етган.
Август охирида Президент Шавкат Мирзиёев тадбиркорлар билан очиқ мулоқотда Асакадаги автомобиль заводида ишлаб чиқарилган автомобиллар экспортга ички бозорга нисбатан 30−40 фоиз арзонроққа сотилганини тан олди. Унинг сўзларига кўра, келгусида рақобат муҳитининг шаклланиши, Тошкент, Наманган ва Жиззах вилоятларида янги заводлар қурилиши натижасида автозавод ўз фаолиятини тубдан қайта кўриб чиқишига тўғри келади.
Изоҳ (0)