IIV YHXBB ijtimoiy tarmoqda YPX xodimidan qochishga uringan Damas haydovchining qo‘lga olinishi tasvirlangan video yuzasidan ma’lumot berdi.
Ijtimoiy tarmoqlarda Urgut tumanida YPX xodimlari ta’qibidan qochgan Damas haydovchisi oxiri berk ko‘chaga kirib qolib, qo‘lga tushgani tasvirlangan video tarqaldi.
Ma’lum qilinishicha, 28-avgust kuni soat 17:40 larda tumanning Navoiy shohko‘chasida YPX xodimi K.Rashidov tomonidan Damas rusumli avtomobil haydovchisiga to‘xtash ishorasi ko‘rsatilganiga qaramay, haydovchi to‘xtamasdan harakatda davom etgan. YPX xodimi va ushbu joyda xizmat olib borayotgan IIB sohaviy xizmatlari xodimlari boshqa bir Damas rusumli avtomobilda bo‘ysunmay ketgan haydovchini kuzatib borgan.
Haydovchi to‘xtagandan so‘ng, xodimlar tomonidan bo‘ysunmaslik holatini bartaraf qilish choralari ko‘rilgan. YPX xodimi tomonidan me’yoriy hujjatlari taqdim qilinishi so‘ralganda, haydovchi hujjatlarini taqdim qila olmagan.
Holat yuzasidan tegishli tartibda bayonnoma va boshqa hujjatlar rasmiylashtirilib, avtomobil vaqtincha saqlash uchun jarima maydoniga qo‘yilgan.
Avvalroq Andijonda Spark kapotida YPX xodimini 60 metrcha sudrab ketgan haydovchiga jinoyat ishi qo‘zg‘atilgani, Toshkentda haydovchi ayol mast holda deb gumon qilgani uchun mashina boshqarishga yo‘l qo‘ymagan YPX xodimini haqoratlagani to‘g‘risida xabar berilgandi.
Izoh (0)