Ҳамма нарсадан ҳафсала пир бўлганда мотивацияни сақлаб қолиш бўйича 5 тавсия

Муаммолар қуршовида юришдан қутулишни истовчилар ва атрофидагилар билан муносабатлари ўнгланмаётганидан ташвишда бўлганларга Стэнфорд университети профессори Бернард Ротнинг «Эришиш одати: Орзу қилишдан тўхта, амалга оширишни бошла ва ўз ҳаётингни бошқар» (The Achievement Habit: Stop Wishing, Start Doing, and Take Command of Your Life) китобидаги тавсияларини ҳавола қиламиз.

Вазиятга бошқа томондан баҳо беришни ўрганинг

Кимдир сизнинг йўлингизга ғов бўлаётгандек ёки ҳаётингизни қийинлаштираётгандек туйилса, «стрелкани буришга» уриниб кўринг. Масалан, муаммо иш жойида бўлса, бошқа жойга кетган тақдирингизда ҳам фақатгина жисмоний ўзгариш амалга оширилгани ҳисобига ушбу вазият қайта такрорланиши мумкин. Бунинг ўрнига вазиятга бўлган муносабатингизни ўзгартиринг. Бернард Ротнинг ҳамкасби раҳбари билан келиша олмаган. Унга бошлиғи ҳаддан ортиқ нарсани талаб қиладигандек туюлган. Шунда Бернард унга ҳамма вақт «У мени ғазаблантиради», дейиш ўрнига «Мен уни ғазаблантираман» дейишни тавсия қилган. Профессорнинг фикрича, бу вазиятга ҳар икки томондан назар ташлашга ёрдам беради. Биз аксарият ҳолларда ўзимиз тан олишни истамаган нарсаларни бошқаларга ағдариб қўямиз. Аммо маълум бўлганидек, тангони ёлғиз ўйнаб бўлмайди. Бошқа одамларнинг ҳам туйғулари борлиги тушуниб етилганда, у билан бўлган муносабат ва ишга бўлган ёндашувни ўзгартиришнинг уддасидан чиқилади.

Янгича ёндашинг

Тўсиқлар сизни тўхтатишига изн берманг — ишга бўлган ёндашишингизни ўзгартиринг. Бир аёл велосипед ҳайдашни ўрганишни жуда ҳам хоҳлаган. Унинг ёши ўттизда, қолаверса ички қулоғи билан муаммо бўлган (бу мувозанатни сақлаш сезгисига таъсир қилади). Аммо аёл ўз орзусидан воз кечмаган, бунинг ўрнига шунчаки уч ғилдиракли велосипед харид қилган. Нимагадир эришишни истайсизми, тўсиқларни четлаб ўтиш йўлларини қидиринг. Таслим бўлманг, айбни бошқаларга тўнкаманг.

Холис бўлиш учун вазиятга четдан туриб баҳо беринг. Шунда муқобил йўл топишга муваффақ бўласиз. Ҳамма нарса мен билан содир бўлмоқда деб ўйлаш ёқимсизликлар домида қолишга олиб келади. Одам унга умуман алоқаси бўлмаган нарсани ўзига олади, арзимаган нарсаларга дили хира бўлади. Ўзингизга ортиқча ташвиш орттирманг. Унутманг, кимдандир дили сиёҳ бўлиб, уни ичига ютиш ёки шунчаки эътибор бермаслик ўзингизга боғлиқ. Хусумат ва норозилик ҳеч қандай наф бермайди, аксинча олға интилишга халақит беради. Мотивацияни эса кўпайтирмаслиги аниқ. Улардан воз кечиб ўз ҳаётингизни тўлақонли яшашингиз мумкин бўлади.

Ҳар тўкисда бир айб эканини унутманг

Ҳаётингиз ва ишингиз, шунингдек, атрофингиздаги инсонлар ҳеч қачон мукаммал бўлмайди. Аммо бу сизни тўхташингизга сабаб бўлмасин. Бошлаш ва омадсизликка учраш қўл қовуштириб, қулай вақт келишини кутгандан кўра яхшироқ. Аҳд қилган ўй-хаёлни амалга ошириш орқали, аввалроқ арзимаган нарса сизни жойингиздан силжишингизга халақит қилганига амин бўлишингиз мумкин бўлади.

Одатларингизни кўздан кечиринг

Барчанинг одатларга суяниш ва автомат равишда ҳаракатланишга мойиллиги бор. Аммо амалдаги ҳаракатлар алгоритми иш бермаётган бўлса, демак, аллақачон уни ўзи ўзгартириш вақти келган. Одатларингизни, улардан қай бири сизга фойда келтиради, қай бири йўқлигини таҳлил қилиб кўринг. Натижа бермайдиганларини шунчаки кўникканингиз учунгина такрорламанг. Иш бермайдиганини бошқа одатга алмаштиринг. Унутманг, ҳеч нима ўзидан ўзи аҳамиятли бўлиб қолмайди: моҳият англатиши ёки йўқлигига ўзингиз сабабчи бўласиз. Ҳаётингиз, фаолиятингиз ва атрофдагилар билан муносабатларингиз қандай экани ўзингиз билан боғлиқ. Ўз реакциянгиз ва вазиятни ҳам назорат қила олишингиз мумкинлигини ўзингизга тез-тез такрорлаб туринг.