Қозон шаҳрида бўлиб ўтаётган Татаристон нефть ва газ-кимё форуми—2021 доирасида бошқарув раиси Меҳриддин Абдуллаев бошчилигидаги «Ўзбекнефтгаз» АЖ делегацияси Taneco мажмуасининг ишлаб чиқариш майдонларига ташриф буюрди.
«Ўзбекнефтгаз» АЖ бошқаруви раиси «Taneco» АЖ бош директори Илшат Салахов ҳамда Kama Tyres компанияси раҳбарияти билан учрашиб, ўзаро музокаралар ўтказди.
«Ўзбекнефтгаз» АЖ делегациясини қабул қилган «Taneco» АЖ бош директори Илшат Салахов ишлаб чиқариш ва қайта ишлаш жараёнлари билан шахсан таништириб, корхона фаолияти, эришилаётган ютуқлар борасида маълумотлар берди.
Учрашувда замонавий нефтни қайта ишлаш ва нефть-кимё корхонаси бўлган «Taneco» АЖ ишлаб чиқариш базасида мавжуд бўлган 20 га яқин сифатли маҳсулотларнинг ишлаб чиқарилиши билан танишиб чиқилди.
Корхона томонидан AI–92, AI–95, AI–98 автомобиль бензинлари, Евро–5 дизель ёқилғиси, RT, TS–1, JET A–1 марка авиация керосини, II ва III гуруҳли таянч мойлари ишлаб чиқарилиши ҳамда ишлаб чиқариш жараёнида замонавий технологиядан фойдаланиш борасида фикр алмашилди.
Ушбу учрашув доирасида енгил автомобиллар, енгил юк машиналари, юк машиналари (комбинацияланган ва қаттиқ пўлат), қишлоқ хўжалиги ва саноат шиналари, шунингдек, асосан диаметри 22,5 дюйм бўлган пўлатдан ясалган янги авлод моделларни ўз ичига олган шиналарнинг ҳам ишлаб чиқарилиши ҳамда уларнинг ишлаб чиқарилиш жараёнлари ҳам ўрганилди.
Маълумот ўрнида айтиш керакки, «Taneco» АЖ ва «Kama Tyres» ОАЖ Татнефть таркибидаги компаниялар гуруҳига киради ва биргина ўтган йилда «Kama Tyres» корхоналарининг конвейерларидан 10,9 миллион долларлик маҳсулотлар чиқарилган.
Ташриф давомида томонлар икки томонлама ҳамкорлик истиқболлари, нефть-кимё, конларни ўзлаштириш, нефтни қайта ишлаш, шунингдек, автомобиль шиналарини ишлаб чиқариш соҳасидаги инвестиция лойиҳаларини амалга ошириш тажрибасини муҳокама қилишди.
Бошқарув раиси «Ўзбекнефтгаз» АЖ тизимидаги корхоналарда ишлаб чиқариш жараёнини янада ривожлантириш учун хорижий корхоналарда амалиётда қўлланилиб келинаётган ахборотлаштириш, рақамлаштириш жараёнларини ҳам ўрганди.
«Ўзбекнефтгаз» АЖ бошқаруви раиси Меҳриддин Абдуллаев ўз навбатида «Taneco» АЖ бош директори Илшат Салаховга халқаро ҳамкорлар ва маслаҳатчиларнинг бевосита иштирокида Ўзбекистонда, яъни Қашқадарё вилоятида нефть ва газ-кимё кластерини яратиш лойиҳасининг амалга оширилаётгани борасида сўзлаб берди.
Бошқарув раиси энг замонавий технологиялар ва хомашёни қайта ишлашда атроф-муҳитга мутлақо салбий таъсир кўрсатмаслик борасида қилинаётган ишларга алоҳида тўхталиб ўтди.
Учрашув якунида томонлар узоқ муддатли стратегик ҳамкорлик бўйича қўшма йўл харитасини ишлаб чиқиш ва соҳада икки томонлама муносабатларни ривожлантириш учун доимий иш режасини яратишга келишиб олдилар.
«Ўзбекнефтгаз» АЖ матбуот хизмати
Изоҳ (0)