Ўзбекистон Республикаси давлат мустақиллигининг 30 йиллиги муносабати билан яна бир янги телеканал — Renessans TV ўз фаолиятини бошлайди. Бу ҳақда Ўзбекистон электрон оммавий ахборот воситалари миллий ассоциацияси хабар берди.
Қайд этилишича, ушбу телеканал 2021 йил 1 сентябрь соат 06:00 дан тест режимида ўз эфирини бошлайди. Ҳозирча республиканинг 70 фоиз ҳудудини қамраб олиши кўзда тутилган телеканал кейинчалик босичма-босқич бутун мамлакат бўйлаб ўз медиамаҳсулотларини тақдим этади.
«Айни пайтда ассоциациямизга аъзо бўлган 48 телерадиоканалнинг 13 тасини ҳудудлардаги 13 та нодавлат телеканал ташкил этади. Уларнинг ҳар бири ўз аудиторияси, ўз тарқалиш ҳудудига эга бўлгани сабабли бир-бири билан рақобатлашмайди. Renessans TV’нинг асосий мақсади ушбу телеканалларни ягона телевизон тармоққа бирлаштириш, ҳар томонлама қўллаб-қувватлашдан иборат. Ўз навбатида жойлардаги жараёнларни, воқеа-ҳодисаларни мунтазам ёритишда ҳудудий нодавлат телеканаллар ҳам бизга яқиндан ёрдам беришади», — дейди ассоциация директори ўринбосари Р.Жабборов.
Хабарда айтилишича, ҳудудий нодавлат телеканалларнинг аксарияти сифатли, лицензияланган медиа-маҳсулотларни сотиб олиш имкониятига эга эмас. Renessans TV эса Ўзбекистон кинематография агентлиги, хусусий киностудиялар, тегишли ташкилотлар билан шартнома асосида турли медиа-маҳсулотлар, фильмлар ва сериалларни мазкур телевизион тармоқ орқали томошабинларга тақдим этади. Шунингдек, жамиятдаги долзарб масалаларнинг етакчи экспертлар, тегишли мутасаддилар, таниқли журналист ва блогерлар иштирокидаги муҳокамасига бағишланган турли форматдаги кўрсатувлар эфирга узатилади.
Ҳозирда телеканалнинг ижодий ва техник гуруҳлари шакллантирилган, эфирга тайёргарлик жараёнлари қизғин давом этмоқда. Тест режимида телеканал ходимлари ўзбек киносининг нодир дурдоналари ҳамда сўнгги йилларда яратилган бадиий ва ҳужжатли фильмлар, мумтоз ва замонавий куй-қўшиқлар, таниқли санъаткорларнинг концерт дастурларини томошабинлар эътиборига ҳавола этади.
Эслатиб ўтамиз, Шавкат Мирзиёев 2019 йил сентябрда Тошкентда ишга тушган Президент мактабида ўтказилган учрашувда Ўзбекистонда учинчи Ренессанс даври бошланаётгани ҳақида биринчи марта фикр билдирган эди. 2020 йил августида, Тошкентда ер усти ҳалқа метро йўлининг биринчи навбати очилишида Президент Ўзбекистон учинчи Ренессанс даврига тайёрланаётганини, Мустақиллик байрамида эса мамлакатда учинчи Ренессанс даврига пойдевор қўйилаётганини таъкидлаган эди.
Бундан аввал Ўзбекистонда Foreign Languages телерадиоканали ташкил этилиши ҳақида хабар берилган эди.
Изоҳ (0)