Марказий ҳарбий округнинг «Фориш» тоғ полигонида Халқаро армия ўйинлари доирасида ўтказилаётган «Ҳарбий-тиббий эстафета» мусобақасининг сўнгги шарти якунланди. Бу ҳақда вазирлик Ахборот ва оммавий коммуникациялар департаменти «Дарё»га маълум қилди.
Мусобақанинг якуний шартида иштирокчилар муҳандислик тўсиқларидан эмаклаб ўтиб, шартли ярадорга биринчи тиббий ёрдам кўрсатиш, тиббий замбил орқали ва арқон ёрдамида сувли тўсиқ устидан олиб ўтиш, санитар ҳарбий техникага жойлаштириб, барча аслаҳаларни йиғиштириб олиш, кейин эса уларни хавфсиз ҳудудга олиб чиқиш каби машқларни бажарди.
Якуний натижаларга кўра, «Жамоавий биринчилик» босқичида эркаклар ҳамда аёллар баҳсларида Ўзбекистон жамоаси юқори натижаларни кўрсатиб, биринчи ўринга сазовор бўлди.
Таъкидлаш керакки, Ўзбекистон Мудофаа вазирлиги жамоаси бу йил ҳам мазкур мусобақанинг «Жамоавий биринчилик» босқичида ўтган йилги натижаларини янгилаб, рекордлар қайд этди. Мазкур шартни бажариш учун ҳамюртларимиз эркаклар ўртасида 5 дақиқа 28,4 сония (ўтган йил – 6'28,8), аёллар ўртасида эса 7 дақиқа 51,3 сония (ўтган йил – 10'09,2) вақт сарф қилди.
Барча шартлар бўйича тўпланган умумий натижаларга кўра:- Ўзбекистон Мудофаа вазирлиги жамоаси – 1-ўрин;
- Россия – 2-ўрин;
- Хитой —3-ўринни эгаллади.
Шунингдек, Ўзбекистон Мудофаа вазирлиги жамоаси VII Халқаро армия ўйинлари доирасида Жазоирда ўтказилган «Содиқ дўст» мусобақасида ҳам биринчи ўринни қўлга киритди.
Мазкур мусобақада иштирокчи жамоалар белгиланган нишонларни ТОЗ-8 қуроли билан яксон қилиш, 300 метрли тўсиқли йўлакдан ўтиш, Dog biatlon (яккалик пойга) ва 1600 метр масофага (Dog biatlon) эстафета югуриш шартларида ўз маҳоратларини кўрсатди. Ўзбекистон жамоаси вакили сержант Улуғбек Нуриллаев 300 метр масофадаги тўсиқларни хизмат ити билан енгиб ўтиш йўлагида янги рекордни ўрнатди.
Шундай қилиб эркаклар жамоалари ўртасида ўтган баҳсларда Ўзбекистон шарафини ҳимоя қилган ҳарбий кинологлар фахрли 1-ўринни қўлга киритди. Иккинчи ўринни эса Россия жамоаси ва учинчи ўринни Беларусь вакиллари банд этди.
Бу йилги мусобақада аёллар жамоаси ҳам илк бор иштирок этди. Шиддатли беллашувларнинг дастлабки шартларидан ўз маҳоратларини кўрсата олган аёллар жамоаси ҳам якунда ғалабани қўлга киритди. Шундай қилиб аёллар ўртасидаги мусобақада биринчи ўринни Ўзбекистон, иккинчи ўринни Россия ва учинчи ўринни Жазоир жамоалари қўлга киритди.
Изоҳ (0)