“Forish” poligonida “Harbiy-tibbiy estafeta” va “Dala oshxonasi” xalqaro musobaqalariga start berildi

Markaziy harbiy okrugning “Forish” tog‘ poligonida “ArMI—2021” VII Xalqaro armiya o‘yinlarining O‘zbekiston mezbonlik qilayotgan “Harbiy-tibbiy estafeta” va “Dala oshxonasi” musobaqasiga 22-avgust kuni start berildi. Bu haqda “Daryo” muxbiri xabar berdi.

Vazirlik tomonidan respulika OAV vakillari uchun “Forish” poligonida yaratilgan sharoitlar bilan tanishtirish maqsadida press-tur o‘tkazildi. Uning doirasida Xalqaro armiya o‘yinlari hakamlari tomonidan matbuot anjumani ham tashkil etildi. Anjuman doirasida jurnalistlar o‘zlarini qiziqtirgan savollarga javob oldi.

Shundan so‘ng OAV vakillari poligonda musobaqa ishtirokchilari uchun yaratilgan sharoitlar bilan tanishdi. Shuningdek, “Dala oshxonasi” musobaqasi o‘tkaziladigan hududda bo‘lib, turli davlatlardan kelgan harbiy oshpazlarning mahoratlarini kuzatdi.

Kechki soat 19:00 da poligon saf maydonida “ArMI—2021” Harbiy-tibbiy estafeta” hamda “Dala oshxonasi” musobaqalarining tantanali ochilish marosimi bo‘lib o‘tdi.

Unda O‘zbekiston mudofaa vaziri, general-leytenant Bahodir Qurbonov, Rossiya mudofaa vaziri o‘rinbosari Timur Ivanov, Jizzax viloyati hokimi Ergash Soliyev, ishtirokchi davlatlar jamoalari vakillari, senatorlar, davlat va jamoat tashkilotlari vakillari, Mudofaa vazirligi huzuridagi Jamoatchilik kengashi a’zolari, faxriylar va yoshlar, jurnalistlar va blogerlar ishtirok etdi.

2021-yilgi “Harbiy-tibbiy estafeta” musobaqasida jami 8 davlat — O‘zbekiston, Xitoy, Rossiya, Belarus, Vyetnam, Myanma, Falastin, Tojikiston ishtirok etayotgan bo‘lsa, “Dala oshxonasi” musobaqasida esa 5 davlat — O‘zbekiston, Vyetnam, Rossiya, Belarus hamda Tojikiston jamoalari o‘zaro bellashmoqda.

Xalqaro musobaqalarni kirish so‘zi bilan ochib bergan O‘zbekiston mudofaa vaziri ishtirokchilarni qutlab, ularga omadlar tiladi. Shundan so‘ng tabrik uchun so‘z Rossiya mudofaa vaziri o‘rinbosari Timur Ivanovga berildi.

Mudofaa vazirligi Markaziy harbiy orkestrining ko‘rgazmali defilesi, taniqli badiiy jamoalar va san’atkorlar ijrosidagi katta konsert dasturi hamda turli xalqlar madaniyatini ifoda etuvchi badiiy chiqishlar namoyish qilindi. Qurolli Kuchlar akademiyasi kursantlari qurol bilan ko‘rgazmali chiqishlarni ijro etdi.

Eslatib o‘tamiz, 2020-yilda O‘zbekiston Mudofaa vazirligi harbiy xizmatchilari Xalqaro armiya o‘yinlari doirasida “Forish” tog‘ poligonida o‘tkazilgan “Harbiy-tibbiy estafeta”, Qo‘qonda esa “Yo‘l patruli” tanlovlarida birinchi o‘rinni qo‘lga kiritgan edi.