Markaziy harbiy okrugning “Forish” tog‘ poligonida Xalqaro armiya o‘yinlari doirasida o‘tkazilayotgan “Harbiy-tibbiy estafeta” musobaqasining so‘nggi sharti yakunlandi. Bu haqda vazirlik Axborot va ommaviy kommunikatsiyalar departamenti “Daryo”ga ma’lum qildi.
Musobaqaning yakuniy shartida ishtirokchilar muhandislik to‘siqlaridan emaklab o‘tib, shartli yaradorga birinchi tibbiy yordam ko‘rsatish, tibbiy zambil orqali va arqon yordamida suvli to‘siq ustidan olib o‘tish, sanitar harbiy texnikaga joylashtirib, barcha aslahalarni yig‘ishtirib olish, keyin esa ularni xavfsiz hududga olib chiqish kabi mashqlarni bajardi.
Yakuniy natijalarga ko‘ra, “Jamoaviy birinchilik” bosqichida erkaklar hamda ayollar bahslarida O‘zbekiston jamoasi yuqori natijalarni ko‘rsatib, birinchi o‘ringa sazovor bo‘ldi.
Ta’kidlash kerakki, O‘zbekiston Mudofaa vazirligi jamoasi bu yil ham mazkur musobaqaning “Jamoaviy birinchilik” bosqichida o‘tgan yilgi natijalarini yangilab, rekordlar qayd etdi. Mazkur shartni bajarish uchun hamyurtlarimiz erkaklar o‘rtasida 5 daqiqa 28,4 soniya (o‘tgan yil – 6'28,8), ayollar o‘rtasida esa 7 daqiqa 51,3 soniya (o‘tgan yil – 10'09,2) vaqt sarf qildi.
Barcha shartlar bo‘yicha to‘plangan umumiy natijalarga ko‘ra:- O‘zbekiston Mudofaa vazirligi jamoasi – 1-o‘rin;
- Rossiya – 2-o‘rin;
- Xitoy —3-o‘rinni egalladi.
Shuningdek, O‘zbekiston Mudofaa vazirligi jamoasi VII Xalqaro armiya o‘yinlari doirasida Jazoirda o‘tkazilgan “Sodiq do‘st” musobaqasida ham birinchi o‘rinni qo‘lga kiritdi.
Mazkur musobaqada ishtirokchi jamoalar belgilangan nishonlarni TOZ-8 quroli bilan yakson qilish, 300 metrli to‘siqli yo‘lakdan o‘tish, Dog biatlon (yakkalik poyga) va 1600 metr masofaga (Dog biatlon) estafeta yugurish shartlarida o‘z mahoratlarini ko‘rsatdi. O‘zbekiston jamoasi vakili serjant Ulug‘bek Nurillayev 300 metr masofadagi to‘siqlarni xizmat iti bilan yengib o‘tish yo‘lagida yangi rekordni o‘rnatdi.
Shunday qilib erkaklar jamoalari o‘rtasida o‘tgan bahslarda O‘zbekiston sharafini himoya qilgan harbiy kinologlar faxrli 1-o‘rinni qo‘lga kiritdi. Ikkinchi o‘rinni esa Rossiya jamoasi va uchinchi o‘rinni Belarus vakillari band etdi.
Bu yilgi musobaqada ayollar jamoasi ham ilk bor ishtirok etdi. Shiddatli bellashuvlarning dastlabki shartlaridan o‘z mahoratlarini ko‘rsata olgan ayollar jamoasi ham yakunda g‘alabani qo‘lga kiritdi. Shunday qilib ayollar o‘rtasidagi musobaqada birinchi o‘rinni O‘zbekiston, ikkinchi o‘rinni Rossiya va uchinchi o‘rinni Jazoir jamoalari qo‘lga kiritdi.
Izoh (0)