Amerika armiyasi o‘z kontingentini Afg‘onistondan olib chiqishni yakunladi. Bu haqda CNN AQSh Qurolli kuchlari Markaziy qo‘mondonligi rahbari general Kennet Makkenziga tayanib yozmoqda.
“Bugungi ketishimiz ham evakuatsiyaning harbiy qismini tugaganini, ham Afg‘onistonda 2001-yil 11-sentabrdan keyin ko‘p o‘tmay boshlangan qariyb 20 yillik missiyaning yakunlanganini anglatadi”, — dedi u.
Makkenzi Amerikaning so‘nggi harbiy-transport samolyoti Kobul aeroportini tark etganini ma’lum qildi.
Harbiy evakuatsiya yakunlandi, ammo AQSh fuqarolariga hamda AQShga ketish huquqiga ega bo‘lgan va buni istaydigan afg‘onlarga yordam berish diplomatik missiyasi davom etmoqda.
AQSh Davlat departamenti ma’lumotlariga ko‘ra, ayni paytda Afg‘onistonda 250 kishidan kamroq AQSh fuqarolari qolmoqda.
AQShning Afg‘onistondagi harbiy missiyasi qariyb 19 yil-u 11 oy davom etdi. Amerika qo‘shinlari mamlakatga 2001-yil 11-sentabrda Nyu-York va Vashingtonda teraktlar uyushtirgan “Al-Qoida” bilan kurashish uchun kelgan edi.
Bu AQSh tarixidagi eng uzoq davom etgan urush bo‘ldi. Unda 2400 dan ortiq Amerika harbiy xizmatchilari halok bo‘ldi, yana 20 mingdan ortig‘i yaralandi. Ushbu missiya AQShga 1-2 trillion dollarga tushgan.
AQSh Afg‘onistondan qo‘shinlarini olib ketish haqida 2020-yilda e’lon qildi. Bu jarayon yakunlanmasdan turib, mamlakatda hokimiyat tepasiga “Tolibon” harakati qaytib keldi, u 1990-yillarda, amerikaliklar Afg‘onsitonga kelishidan oldin mamlakatning katta qismini boshqargan.
Amerika va “Tolibon” o‘rtasidagi kelishuvga muvofiq, AQSh o‘z qo‘shinlarini Afg‘onistondan 2021-yil 31-avgustgacha olib ketishi kerak edi.
Mavzuga doir:
Izoh (0)